وڈیاں تنصیبات نوں بچان لئی بند توڑے جا رئے نیں: عظمیٰ بخاری

لاہور: وزیر اطلاعات پنجاب عظمیٰ بخاری نے کہیا اے کہ وڈیاں تنصیبات نوں محفوظ کرن لئی بندتوڑے جا رئے نیں، امید اے کہ ڈھائی لکھ کیوسک پانی راوی تے شاہدرہ توں گزر جائے گا۔ صوبائی وزیر عظمیٰ بخاری نے کہیا کہ حفاظتی بند اُتے وی نظر رکھی جا رئی اے، علاقہ مکیناں نوں پہلے محفوظ مقام اُتے منتقل کیتا جا ریا اے، فیر بند توڑے  جاندے نیں۔ انساناں دے نال نال مویشیاں نوں وی محفوظ جگہاں اُتے لے جایا گیا اے۔اوہناں کہیا کہ امید اے ڈھائی لکھ کیوسک پانی راوی تے شاہدرہ توں گزر جائے گا۔ ہیڈ قادر آباد دی گنجائش 9 لکھ اے، ساڑھے 9 لکھ کیوسک دا ریلا گزر چکیا اے جس توں بعد ہیڈ قادر آباد وچ پانی دی سطح کٹنی شروع ہو گئی اے۔ اپنے گھر نوں چھڈ کے ریلیف کیمپا وچ رہنا آسان کم نئیں، انسانی جاناں نوں بچانا حکومت دی اولین ترجیح اے۔عظمیٰ بخاری نے کہیا کہ لوگ بند اُتے کھڑے ہو کے سیلاب ویکھ رئے نیں، ایہہ ویکھن والی چیز نئیں۔ بچے سیلابی پانی وچ نہا رئے نیں، ایس قسم دے شغل میلے دی گنجائش نئیں۔ عوام نوں چاہیدا اے انتظامیہ نال تعاون کرن۔اوہناں مزید کہیا کہ وزیرآباد شہر وچ حالات معمول دے مطابق نیں، وزیرآباد دی مرکزی سڑک توں پانی اتر چکیا اے۔صوبائی وزیر نے آکھیا کہ فلور ملز نے بہانہ بنایا کہ سیلاب دی وجہ نال قیمتاں ودھ گئیاں نیں، جدو کہ وزیراعلیٰ پنجاب دا روٹی تے آٹے دی قیمت اُتے زیرو ٹالرنس اے۔ امید اے سیلاب دے باوجود پنجاب وچ گندم دی وافر پیداوار ہووے گی۔