پاکستان لئی پہلا گولڈ میڈل جتݨ والا ریسلر دین محمد انتقال کر گیا۔

پاکستان لئی پہلا گولڈ میڈل جتݨ والا ریسلر دین محمد انتقال کر گیا۔
دین محمد نے 1954 دیاں ایشین گیمز وچ پاکستان لئی گولڈ میڈل جتیا سی۔ ریسلر دین محمد پہلوان دی عمر سو سال توں ودھ سی۔
لاہور دے نواحی علاقے باٹا پور دے رہائشی دین محمد پہلوان نے منیلا وچ ہون والی ایشین گیمز وچ پاکستان دی نمائندگی کیتی، تے پاکستان دا پرچم بلند کیتا۔ اوہنے ایہہ ٹائٹل جتن لئی فلپائن، بھارت تے جاپان دے پہلواناں نوں شکست دتی سی۔
دین محمد نے ایشین گیمز وچ میڈل جتݨ توں علاوہ کئی بین الاقوامی مقابلےآں وچ وی پاکستان دا پرچم بلند کیتا، تے کامن ویلتھ گیمز وچ وی کانسی دا تمغہ (برونز میڈل) حاصل کیتا۔
صوبائی وزیر کھیل ملک فیصل ایوب کھوکھر تے ڈی جی سپورٹس پنجاب خضر افضال چوہدری نے بابا دین محمد دے انتقال اُتے گہرے دکھ تے افسوس دا اظہار کیتا اے۔
صوبائی وزیر کھیل نے آکھیا کہ ریسلر دین محمد دیاں ملک لئی کیتیاں ہوئیاں خدمات ناقابلِ فراموش نیں، تے اوہنے ریسلنگ دے میدان وچ پاکستان دا پرچم ہمیشہ بلند رکھیا۔