پنجاب وچ اوچے درجے دا سیلاب، لکھاں شہری متاثر، 22 افراد جان بحق، متعدد لاپتا

لاہور: بھارت ولّوں پانی چھڈن توں بعد دریائے راوی، چناب تے ستلج وچ شدید سیلابی صورتحال  دی وجہ توں  تباہی مچ گئی، بستیاں ڈُب گئیاں، لکھاں بندے متاثر ہوئے تے 22 جان بحق، جدو کہ کئی لاپتا ہو گئے۔پنجاب دے وڈے دریاواں توں پانی کناریاں توں نکل کے آبادیاں وچ داخل ہون نال لکھاں ایکڑ زرعی زمین تباہ ہو گئی، 6 لکھ توں ودھ بندے متاثر ہو چکے نیں، سینکڑاں پنڈ زیر آب آ چکے نیں، جدو کہ بنیادی ڈھانچے دے نقصان دا اندازہ پانی ہٹن توں بعد ہی لگا سککدے نیں َ ۔

راوی سائفن تے خطرناک بہاؤ
دریائے راوی وچ راوی سائفن اُتے پانی دے بہاؤ وچ مسلسل اضافہ ہو ریا اے جو انتہائی اونچے درجے دے سیلاب دی سطح اُتے پہنچ چکیا اے۔ایس ویلے راوی سائفن وچ اک لکھ 91 ہزار کیوسک دا ریلا گزر ریا اے۔

شاہدرہ اُتے صورتحال
دریائے راوی وچ شاہدرہ تے پانی وچ اضافہ ہون توں بعد اونچے درجے دا سیلاب اے تے پانی دا بہاؤ اک لکھ 75 ہزار کیوسک ہو گیا اے۔کمشنر لاہور کہندے نیں کہ ہالے تک راوی وچ سیلاب قابو وچ اے، راوی دی گنجائش 2 لاکھ 50 ہزار کیوسک اے۔ انتظامیہ تے سارے محکمے ہائی الرٹ اُتے نیں۔

ہیڈ قادر آباد تے دباؤ وچ کمی
پی ڈی ایم اے پنجاب دے مطابق دریائے چناب وچ ہیڈ قادر آباد اُتے پانی دا دباؤ کٹ ریا اے، کل نالوں اک لکھ کیوسک کٹ بہاؤ ریکارڈ ہویا۔ صبح 6 وجہ 9 لاکھ 96 ہزار سی تے 9 وجہ 9 لاکھ کیوسک رہ گیا۔
قادر آباد ہیڈ ورکس دی صلاحیت 8 لاکھ کیوسک اے، اس لئی صورتحال ہن وی غیر معمولی اے۔ بائیں پاسے دے بند نوں مزید مضبوط بنایا جا ریا اے۔

ریلیف کمشنر پنجاب دا بیان
ریلیف کمشنر نبیل جاوید نے کمشنرز تے ڈپٹی کمشنرز نوں فیلڈ وچ موجود رہن دی ہدایت دِتی۔ کہیا کہ متاثرہ علاقیاں توں انخلا جلد یقینی بنایا جائے۔ عوام دی جان تے مال دی حفاظت اولین ترجیح اے۔