دفتر خارجہ نے سندھ طاس معاہدے بارے بھارتی وزیر داخلہ دا بیان مسترد کر دِتا
دفتر خارجہ دے ترجمان نے کہا اے کہ پاکستان اپنی طرفوں ایہ معاہدہ دا مکمل احترام کردا اے تے اپنے جائز حقوق تے مفادات دی حفاظت لئی سارے ضروری اقدامات کرے گا۔
بھارتی وزیر داخلہ دے سندھ طاس معاہدے دی بحالی نوں مکمل طور تے رد کرن والے بیان تے دفتر خارجہ دے ترجمان نے ردعمل دِتا اے کہ "ایہ بیان بین الاقوامی معاہدیاں دی حرمت دی کھلی خلاف ورزی تے شدید بے حسی دا مظہر اے، سندھ طاس معاہدہ کوئی سیاسی مفاہمت نئیں بلکہ اک بین الاقوامی معاہدہ اے جتھے کسے وی یک طرفہ اقدام دی کوئی گنجائش نئیں۔
اوہناں نے کہا کہ بھارت دی طرفوں معاہدہ نوں معطل کرن دا غیر قانونی اعلان بین الاقوامی قانون، معاہدے دیاں شقاں تے ریاستاں دے باہمی تعلقات دے بنیادی اصولاں دی کھلی خلاف ورزی اے۔
ترجمان نے کہا کہ ایس قسم دا رویہ نہایت خطرناک تے غیر ذمہ دارانہ مثال بناندا اے، جیہڑا بین الاقوامی معاہدیاں دی ساکھ نوں نقصان پہنچاندا اے تے ایسی ریاست دی سنجیدگی تے سوال اٹھاندا اے جیہڑی کھلے عام اپنے قانونی وعدیاں توں منہ موڑدی اے۔
ترجمان دا کہنا اے کہ پانی نوں سیاسی ہتھیار ورگ استعمال کرنا غیر ذمہ دارانہ عمل اے تے عالمی سطح تے تسلیم شدہ ریاستی اصولاں دے منافی اے۔ بھارت نوں چاہیدا اے کہ اوہ فوری طور تے اپنے یک طرفہ تے غیر قانونی موقف نوں واپس لے تے سندھ طاس معاہدے اُتے مکمل تے بلا رکاوٹ عملدرآمد بحال کرے۔ پاکستان اپنی طرفوں ایس معاہدے دا مکمل احترام کردا اے تے اپنے جائز حقوق تے مفادات دی حفاظت لئی سارے ضروری اقدامات کرے گا۔
