سپریم کورٹ نے نظر ثانی دی درخواستاں منظور کر لیاں، پی ٹی آئی نوں مخصوص نشستاں دین دا فیصلہ کالعدم قرار دے دتا ۔
سپریم کورٹ نے نظر ثانی دی درخواستاں منظور کر لیاں، پی ٹی آئی نوں مخصوص نشستاں دین دا فیصلہ کالعدم قرار دے دتا ۔
سپریم کورٹ نے 6 دے مقابلے وچ 7 ججاں دی اکثریت نال نظرثانی دی درخواستاں منظور کر لیاں تے پشاور ہائیکورٹ دا فیصلہ برقرار رکھدے ہوئے پاکستان تحریک انصاف نوں مخصوص نشستاں دین دا حکم کالعدم قرار دے دتا۔
سپریم کورٹ وچ مخصوص نشستاں دے کیس وچ اٹارنی جنرل دے دلائل مکمل ہوئے، جنہاں دے بعد کیس دی سماعت مکمل ہو گئی۔
اس موقعے تے جسٹس امین الدین خان نے آکھیا کہ کچھ دیر وچ مختصر فیصلہ سنایا جائے گا۔
بعد وچ سپریم کورٹ دے آئینی بینچ دے سربراہ جسٹس امین الدین خان نے مختصر فیصلہ سنایا۔ عدالت نے 6 دے مقابلے وچ 7 ججاں دی اکثریت نال نظرثانی درخواستاں منظور کر لیاں تے پشاور ہائیکورٹ دا فیصلہ بحال رکھیا۔
مخصوص نشستاں ہُن نون لیگ، پیپلز پارٹی تے ہور اتحادی جماعتاں نوں ملن گیاں۔
فیصلہ سناؤن والے 7 ججاں وچ شامل نیں: جسٹس امین الدین خان، جسٹس مسرت ہلالی، جسٹس نعیم اختر افغان، جسٹس شاہد بلال، جسٹس ہاشم کاکڑ، جسٹس عامر فاروق تے جسٹس علی باقر نجفی۔
جسٹس حسن اظہر رضوی تے جسٹس محمد علی مظہر نے مشروط طور تے نظرثانی دی درخواست منظور کیتی، جدوکہ جسٹس جمال مندوخیل اپنے پہلے والے فیصلے اُتے قائم رہے۔
ایہہ گل وی واضح رہے کہ سپریم کورٹ وچ نظرثانی درخواستاں اُتے اج 17ویں سماعت سی۔ سپریم کورٹ دے 13 رکنی فل کورٹ نے 12 جولائی 2024 نوں 8 ججاں دی اکثریت نال مخصوص نشستاں پی ٹی آئی نوں دین دا فیصلہ دتا سی۔
سپریم کورٹ وچ جولائی 2024 وچ مسلم لیگ (ن)، پیپلز پارٹی تے اگست وچ الیکشن کمیشن نے ایہ نظرثانی درخواستاں داخل کیتیاں۔ سپریم کورٹ دے 13 رکنی آئینی بینچ وچ 6 مئی نوں ایہ درخواستاں سماعت لئی مقرر کیتیاں گئیاں۔
آئینی بینچ وچ شامل جسٹس عائشہ ملک تے جسٹس عقیل عباسی نے 6 مئی نوں درخواستاں رد کر کے بینچ توں علیحدگی اختیار کر لئی، جدوکہ 17ویں سماعت تے جسٹس صلاح الدین پنہور نے وی کیس سنن توں معذرت کر لئی۔
الیکشن کمیشن، مسلم لیگ ن تے پیپلز پارٹی ولوں اپنے تحریری دلائل عدالت وچ جمع کرائے گئے۔
سنی اتحاد کونسل دی طرفوں فیصل صدیقی تے حامد خان نے دلائل پیش کیتے، جدوکہ پاکستان تحریکِ انصاف دی طرفوں وکیل سلمان اکرم راجا عدالت وچ پیش ہوئے۔
یاد رہے کہ 14 مارچ 2024 نوں پشاور ہائیکورٹ نے مخصوص نشستاں بارے سنی اتحاد کونسل والیاں درخواستاں مسترد کر دتیاں سن۔
