معرکۂ حق بھارت دی یادداشت توں کدی وی نہیں مِٹے گا،فیلڈ مارشل سید عاصم منیر

معرکۂ حق بھارت دی یادداشت توں کدی وی نہیں مِٹے گا،فیلڈ مارشل سید عاصم منیر

شہر قائد وچ فیلڈ مارشل سید عاصم منیر دا پی این ایس رہبر وچ پاکستان نیوی دی پاسنگ آؤٹ پریڈ نوں خطاب
فیلڈ مارشل سید عاصم منیر نے کراچی وچ پاکستان نیول اکیڈمی پی این ایس رہبر وچ ہون والی پاسنگ آؤٹ پریڈ دوران خطاب کردے ہوئیاں آکھیا کہ اوہ دوست ممالک ترکی، بحرین، عراق، فلسطین تے جبوتی دے کامیاب کیڈٹس نوں دل توں مبارکباد پیش کردے نیں۔ انہاں آکھیا کہ تُسیں جلد پاک بحریہ دا حصہ بنن جا رہے او۔
اوہناں ایوارڈ جتن والے کیڈٹس دی شاندار کارکردگی دی خاص تعریف کیتی تے آکھیا کہ پریڈ وچ کیڈٹس دا مثالی ٹرن آؤٹ پاکستان نیول اکیڈمی دے اعلیٰ معیار دا عکاس اے۔ اوہناں نوجواناں نوں ہدایت دِتی کہ اوہ اپنی پیشہ ورانہ صلاحیتاں نوں جاری رکھن۔
فیلڈ مارشل نے زور دِتا کہ ترقی دے لئی عوام تے فوج دے وچکار مضبوط رشتہ بہت ضروری اے۔ اوہناں آکھیا کہ بحری جنگ دا میدان تیزی نال بدل رہیا اے تے خطے وچ میری ٹائم سکیورٹی دے مسائل ودھدے جا رہے نیں، ایس لئی پاکستان لئی مضبوط میری ٹائم فورس رکھنا ہن لازمی ہو چکیا اے۔
فیلڈ مارشل سید عاصم منیر نے مزید آکھیا کہ دہشتگردی دے خلاف جنگ نوں منطقی انجام تک پہنچایا جائے گا، معرکہ حق بھارت دی یادداشت وچ ہمیشہ زندہ رہے گا۔ اوہناں بھارت اُتے الزام لاندے ہوئیاں آکھیا کہ اوہ مسلسل متکبرانہ تے جارحانہ رویہ اختیار کیتا ہویا اے، پر پاکستان دے مؤثر جواب نے پورے خطے نوں وڈے تنازعے توں بچا لیا اے۔
اوہناں آکھیا کہ بھارت اپنی فوجی طاقت تے جھوٹے اسٹریٹجک منصوبے دے ذریعے سیاسی فائدے لینا چاندے نیں۔ اوہناں الزام لایا کہ بھارت نے دہشتگردی دے خلاف کارروائی دے بہانے پاکستان اُتے بلاجواز حملے کیتے، پر پاکستان نے ہمیشہ صبر تے تحمل دا مظاہرہ کیتا۔ فیلڈ مارشل نے آکھیا کہ آج پاکستان خطے وچ "نیٹ ریجنل سٹیبلائزر” دے طور تے جانے جاندا اے۔
اوہناں کشمیر دے مسئلے اُتے وی گل کیتی تے آکھیا کہ اس تنازعے دا حل لازمی اے، کشمیری عوام بھارت دے غیر قانونی قبضے دے خلاف اپنی جدوجہد جاری رکھے ہوئیاں نیں۔ ایس نازک وقت وچ ساڈے لئی ضروری اے کہ اسی کشمیری عوام نوں یاد رکھئیے۔ اوہناں آکھیا کہ پاکستان، کشمیریاں دی حق خودارادیت دی جائز جدوجہد دا حامی اے۔
تقریب دوران، فیلڈ مارشل سید عاصم منیر نوں پاکستان نیوی دے چاق و چوبند دستے نے سلامی پیش کیتی، اوہناں پریڈ دا معائنہ وی کیتا۔ اوہناں 123ویں مڈ شپ مین تے 31ویں شارٹ سروس کمیشن کورس وچ نمایاں کارکردگی دکھاؤن والے کیڈٹس نوں انعامات وی تقسیم کیتے۔
ایس شاندار تقریب وچ پاک بحریہ دے اعلیٰ افسران، فارغ التحصیل کیڈٹس دے اہلِ خانہ تے غیر ملکی سفارتکار وی شریک ہوئے۔
پاسنگ آؤٹ پریڈ دوران کیڈٹس کولوں ذمے داریاں نبھاؤن دا حلف لیا گیا۔ مہمانِ خصوصی فیلڈ مارشل سید عاصم منیر نے اعزازی شمشیر کیڈٹ عبدالرحمٰن نوں عطا کیتی۔