امریکی صدر ڈونلڈ ٹرمپ، یوکرینی صدر زیلنسکی دی ملاقات

روس-یوکرین جنگ بندی دے حوالے نال وائٹ ہاؤس وچ امریکی صدر ڈونلڈ ٹرمپ، یوکرینی صدر زیلنسکی تے یورپی رہنماواں دی اہم ملاقات ہوئی۔امریکی صدر ڈونلڈ ٹرمپ نے زیلنسکی نوں یوکرین دا 20 فیصد چھوٹا نواں نقشہ تھما دتا۔ گال بات دے دوران ٹرمپ نے آکھیا کہ روس نال جنگ ختم ہووے گی پر ٹائم فریم نہیں دس سکدا۔ اوناں اکھیا  کہ روس-یوکرین امن معاہدہ جلد مستقبل وچ ممکن اے، امن قائم کرن لئی امریکا، روس تے یوکرین مل کے کم کرن گے۔ٹرمپ نے زور دتا کہ یوکرین وچ جنگ روکنے دا وڈیا موقع اے، روسی صدر پیوٹن وی جنگ دا خاتمہ چوندے نیں، مستقل امن لئی قدم چُک رہے نیں۔ اگر حالات ٹھیک رہے تاں سہ فریقی ملاقات ہوگی۔ پیوٹن یوکرین دی سکیورٹی ضمانتاں منظور کر چکے نیں۔یوکرینی صدر زیلنسکی نے آکھیا کہ ساڈا اک ہی مقصد اے—یوکرین جنگ دا خاتمہ۔ انہاں کہیا کہ جنگ بندی لئی ٹرمپ، پیوٹن تے زیلنسکی دی ملاقات ممکن اے۔ انہاں دا کہنا سی کہ جنگ وچ کافی جانی تے مالی نقصان ہو چکیا اے، صدر ٹرمپ دے سفارتی راستے دی حمایت کردے آں، سانوں اپنی سکیورٹی دی ضمانت چاہی دی اے۔صدر ٹرمپ نے اک وار فیر پاک-بھارت جنگ بند کراؤن دا ذکر وی کیتا تے آکھیا کہ دنیا نوں علم اے کہ اک وڈی جنگ رکوائی گئی۔ اوہناں کہیا کہ ساڈی خواہش اے دنیا وچ امن ہووے تے سب ملک آپس وچ تجارت کرن۔