قائمہ کمیٹیاں کیس ختم کراؤن لئی نئیں، اسی قانون دے مطابق چلّاں گے، اعظم تارڑ

قائمہ کمیٹیاں کیس ختم کراؤن لئی نئیں، اسی قانون دے مطابق چلّاں گے، اعظم تارڑ

قائمہ کمیٹیاں کیسز ختم کراؤن لئی نئیں، قانون دے مطابق ہی چلّاں گے: اعظم نذیر تارڑ
وفاقی وزیر قانون اعظم نذیر تارڑ نے قومی اسمبلی وچ اظہار خیال کردے ہوۓ آکھیا کہ قائمہ کمیٹیاں کیسز معاف کراؤن لئی نئیں بنائیاں گئیاں، اساں قانون دے پابند آں تے قانون دے مطابق ہی کم ہووے گا۔
اعظم نذیر تارڑ نے کہا کہ سٹینڈنگ کمیٹیاں دے رولز سب نے مل کے بنائے نیں، انہاں کمیٹیاں کولوں پولیس تفتیش والا اختیار لینا ممکن نئیں۔ اوہناں کہا کہ جے سٹینڈنگ کمیٹی دے ایجنڈے دا پہلا صفحہ تے صفحہ 17 قیدی نمبر 804 دے متعلق ہووے گا، تے اسمبلی سیکریٹریٹ کجھ نئیں کر سکے گا۔
اوہناں مزید کہا کہ قائمہ کمیٹیاں جیل وچ سہولتاں یا ذاتی فائدے لئی نئیں، بلکہ قانون سازی تے نگرانی لئی بنائیاں گئیاں نیں۔
وزیر قانون دی تقریر دوران اپوزیشن نے شور شرابا، ڈیسکاں بجا کے نعرے بازی کیتی۔ اس موقعے تے اعظم تارڑ نے کہا کہ اپوزیشن نوں صرف تنقید نئیں، بلکہ سنن دا وی حوصلہ رکھنا چاہیدا اے۔
اعظم نذیر تارڑ نے الزام لایا کہ پی ٹی آئی دور وچ انسانی حقوق دی سنگین خلاف ورزیاں ہوئیاں، سیاسی مخالفین نوں نشانہ بنایا گیا۔ اوہناں مزید کہا کہ اپوزیشن صرف بانی پی ٹی آئی نوں خوش کرن لئی غیر سنجیدہ رویہ اختیار کر رہی اے۔
وزیر قانون نے واضح کیتا کہ کسی وی وزیر کول کرپشن کیسز معاف کرن دا اختیار نئیں۔ اوہناں طنزاً آکھیا:
"کاش وزارت انسانی حقوق کول ایہ اختیار ہوندا تے میں حاضر ہوندا، کاش جیل وچ میاں بیوی نوں اکٹھے رکھن دی اجازت ہوندی تے میں ضرور کردا۔”
اوہناں سوال کیتا کہ:
"کی مریم نواز دے کمرے دا دروازہ توڑن نال چادر تے چاردیواری پامال نئیں ہوئ؟ فریال تالپور نوں عید توں پہلاں جیل چ پایا گیا، اوتھے چادر و چاردیواری دا احترام ہویا؟”
اعظم تارڑ نے ایہ وی کہا کہ:
"مینوں ایہ گل خوشی دی ہوندی جے اس گل دی تعریف کیتی جاندی کہ پہلی واری پاکستان نوں عالمی سطح تے اے اسٹیٹس ملے، چائلڈ میرج ایکٹ یا کرسچن میرج ایکٹ تے گل ہوندی تے وڈی کامیابی ہوندی۔ پر افسوس، معصوم موضوع نوں سیاست دا شکار بنا دتا گیا۔”
اوہناں واضح کیتا کہ بجٹ ایلوکیشن دا قائمہ کمیٹی نال کوئی تعلق نئیں، وزارت انسانی حقوق کول چار کمیشن نیں، پر قائمہ کمیٹیاں کول نہ تے جیل وچ ملاقاتاں کروان دا اختیار اے، نہ میاں بیوی نوں اکٹھے ملوان دا، تے نہ ہی عدالتاں کولوں تاریخاں لبھواؤان دا۔