ایئر کینیڈا دے ملازماں دی ہڑتال

ایئر کینیڈا نوں اک وڈے بحران دا سامنا اے،  ملازماں دی مکمل ہڑتال دی وجہ توں فضائی آپریشن معطل کر دتے گئے نیں۔ ایہہ اچانک فیصلہ سینکڑاں پروازاں نوں متاثر کر چکیا اے تے لکھاں مسافر مشکلات دا شکار ہو گئے نیں۔غیر ملکی میڈیا دے مطابق، ایئر کینیڈا تے "کینیڈین یونین آف پبلک ایمپلائز” دے درمیان پچھلے اٹھ مہینے توں مذاکرات جاری سن، پر کسے نتیجے تے نہ پہنچن دی وجہ توں لگ بھگ 10 ہزار ملازم ہڑتال تے چلے گئے۔ایئر کینیڈا روزانہ  700 پروازاں پہنچاندے سن ، تے ایہہ بندش اک دن وچ 1 لکھ 30 ہزار مسافراں نوں متاثر کرے گی۔ لگ بھگ 25 ہزار کینیڈین شہری بیرونِ ملک پھنس سکدے نیں۔ملازماں دا کہنا اے کہ اوہ تنخواہواں وچ مناسب اضافے نہ ہون تے بغیر معاوضے دے کم دے خلاف احتجاج کر رہے نیں۔دوجے پاسے ایئرلائن انتظامیہ دا مؤقف اے کہ اوہناں ملازماں نوں اگلے چار سالاں وچ تنخواواں، سہولتاں تے پنشن ملا کے کُل 38 فیصد معاوضے وچ اضافے دی پیشکش کیتی سی، پر یونین ایہنوں ناکافی سمجھدی اے۔ اوہناں آکھیا کہ صرف پہلے سال وچ 8 فیصد دا اضافہ مہنگائی دے بوجھ نوں گھٹان لئی کافی نئیں۔ایئر کینیڈا نے اعلان کیتا اے کہ متاثرہ مسافر کمپنی دی ویب سائٹ یا موبائل ایپ توں اپنی رقم دی واپسی لئی درخواست دے سکدے نیں۔ انتظامیہ ایہہ وی کہہ رہی اے کہ اوہ دوجیاں کینیڈین یا غیر ملکی ایئرلائنز دے ذریعے متبادل سفر مہیا کرن دی کوشش کرے گی، پر مصروف شیڈول دی وجہ توں مکمل گارنٹی دینا ممکن نئیں ہووے گا۔ایئر کینیڈا دی ایہہ ہڑتال نہ صرف فضائی نظام نوں مفلوج کر گئی اے، بلکہ ہزاراں مسافراں وچ بے یقینی دی کیفیت وی پیدا ہو گئی اے۔