اسرائیل دی غزہ شہر اُتے قبضہ کرن لئی زمینی کارروائی

 اسرائیل نے غزہ شہر اُتے قبضہ کرن لئی زمینی کارروائی دا آغاز کر دِتا اے، جدکہ اسرائیل نے مغربی کنارے وچ فلسطینیاں دی زمین اُتے آپڑیاں بستیاں بناؤن دا منصوبہ منظور کر لِیا، جِس دی فرانس تے جرمنی نے مذمت کیتی اے۔فرانسیسی صدر ایمانویل ماکروں نے آکھیا اے کہ غزہ شہر اُتے کنٹرول حاصل کرن لئی اسرائیلی فوجی کارروائی دونویں قوماں  دے لوکاں لئی مکمل تباہی دا سبب بن سکدی اے۔ اسرائیل دا ایہہ منصوبہ "خطے نوں اک مستقل جنگ ول دھکیل دُوے گا۔”ایمانویل ماکروں نے اسرائیلی ریاست دے وزیراعظم نیتن یاہو دے انہاں الفاظ دی سخت مذمت کیتی اے کہ "فرانس ولوں فلسطینی ریاست نوں تسلیم کرن دا اعلان یہود دشمنی دی آگ اُتے تیل پاؤن دے برابر اے۔”اردن دے وزیر خارجہ نے آکھیا اے کہ غزہ اُتے اسرائیل دے مظالم نال قتلِ عام تے فاقہ کشی ہو رہی اے تے انہاں دے وسیع اقدامات نال مشرقِ وسطیٰ وچ امن دیاں ساریاں امیداں ختم ہو رہیاں نیں۔اقوامِ متحدہ دے مطابق جنگ شروع ہون توں بعد توں علاقے دی زیادہ تر آبادی بے گھر ہو چکی اے تے انہاں وچوں کئی لوک کئی وار بے گھر ہوئے نیں۔ادھر جرمنی ولوں وی غزہ وچ اسرائیلی فوجی آپریشن وچ اضافے دی مذمت کیتی گئی اے۔جرمن حکومت دے ترجمان اشٹیفن میئر نے صحافیاں نوں دسیا کہ جرمنی لئی ایہہ سمجھنا ہور مشکل ہوندا جا رہا اے کہ انہاں کارروائیاں نال سارے یرغمالی آزاد ہون گے یا جنگ بندی ہووے گی۔جرمنی دے وفاقی وزیر خارجہ یوہان واڈے فیہول نے مقبوضہ مغربی کنارے دے اک انتہائی حساس علاقے وچ اسرائیلی بستیواں دے نویاں تعمیراتی منصوبیاں دی منظوری دی سخت مذمت کیتی اے تے آکھیا اے کہ جے ایس طرح دے منصوبے عملی جامہ پہن لَے گئے تاں ایہہ بین الاقوامی قانون دی خلاف ورزی ہووے گی تے دو ریاستی حل نوں ناممکن بنا دیوے گی۔جرمن وزیر خارجہ نے زور دِتا کہ جرمن حکومت دو ریاستی حل دی حامی اے، ایس لئی اسی سختی نال مشورہ دیندے آں کہ اس راہ اُتے ہور اگے نہ ودھیا جاوے۔