ٹرمپ دا ٹیلیفونک رابطہ

مریکی صدر ڈونلڈ ٹرمپ نے الاسکا توں واپسی اُتے اپنے یوکرینی ہم منصب ولادیمیر زیلنسکی نال لمبی گفتگو کیتی، جس وچ اوہناں آکھیا کہ روسی صدر پیوٹن جنگ بندی نئیں بلکہ مکمل امن معاہدہ چاہندے نیں۔وائٹ ہاؤس دی پریس سیکرٹری کیرولین لیویٹ دے مطابق، صدر ٹرمپ نے 6 گھنٹے دی پرواز دا وڈا حصہ فون تے گزاریا، زیلنسکی نال گل بات توں بعد اوہ نیٹو دے رکن ممالک دے رہنماواں نال وی رابطے وچ آئے۔زیلنسکی دے دفتر نے ایہہ تصدیق کیتی کہ اوہنے ہفتے دی صبح صدر ٹرمپ نال گل بات کیتی۔یوکرینی صدر ولادیمیر زیلنسکی نے دسیا کہ اوہ پیر والے دن واشنگٹن ڈی سی وچ امریکی صدر ڈونلڈ ٹرمپ نال ملاقات کرن گے۔ ٹیلیفونک گفتگو دے بعد اوہنے آکھیا کہ یوکرین امن حاصل کرن لئی اپنی پوری کوشش نال کم کرن دی تصدیق کر دا اے۔اوہنے مزید آکھیا کہ صدر ٹرمپ نے روسی رہنما پیوٹن نال ہون والی ملاقات تے گل بات دے اہم نکات سانجھے کیتے، جو ایہہ ویکھان لئی اہم نیں کہ امریکا دی طاقت ایس صورت حال اُتے اثرانداز ہو سکدی اے۔اوہنے ایہہ وی آکھیا کہ پیر نوں اوہ صدر ٹرمپ نال واشنگٹن ڈی سی وچ ملاقات کرن گے، جتھے قتل و غارت تے جنگ روکنے دے ہر پہلو اُتے گل بات ہوے گی۔ اوہنے ایس دعوت تے صدر ٹرمپ دا شکریہ ادا کیتا۔زیلنسکی نے صدر ٹرمپ ولوں دتی گئی سہ فریقی ملاقات  دی تجویز دی حمایت وی کیتی۔ فرانسیسی حکومت دے مطابق یورپی رہنماواں نے الاسکا اجلاس توں بعد، صدر ٹرمپ تے زیلنسکی نال اک لمبی کال وچ حصہ لیا، جو اک گھنٹے توں ودھ جاری رہی۔نیٹو دے سیکریٹری جنرل مارک روٹے تے یورپی یونین دی صدر ارسلا وان ڈیر لیین وی اس کال وچ شامل ہوئیاں۔دوجے  پاسے کریملن دے سینئر معاون یوری اوشاکوف  نے آکھیا کہ الاسکا وچ صدر ٹرمپ تے پیوٹن دی ملاقات دے  دوران زیلنسکی نوں شامل کرن دا خیال زیر غور نئیں آیا۔ایہہ بیان اُس وقت آیا جدوں ٹرمپ نے سربراہی اجلاس دے بعد آکھیا سی کہ پیوٹن تے زیلنسکی دونوں  چاہندے نیں کہ اوہ اگلی ملاقات وچ وی شامل ہوون، تے امن دی راہ وچ گل بات ہووے۔اوشاکوف نے ایہہ وی آکھیا کہ ہن تک ایہہ واضح نئیں کہ صدر ٹرمپ تے پیوٹن دی اگلی ملاقات کدوں ہووے گی۔