ایشیا کپ 2025: بھارتی بورڈ نوں ٹیم سلیکشن دی فکر لاحق، مشاورت شروع کر دتی
بھارتی کرکٹ بورڈ (بی سی سی آئی) نوں ایشیا کپ 2025 دی تیاری نوں لے کے پریشانی لاحق ہو گئی اے، جتھے ٹیم سلیکشن وڈی سردردی بن چکی اے۔
بھارتی میڈیا دے مطابق، بورڈ دے سلیکٹرز تے ٹیم مینجمنٹ نے مشاورت شروع کر دتی اے، تے امکان اے کہ 19 یا 20 اگست نوں سکواڈ دا اعلان کر دتا جاوے گا۔
رپورٹس وچ دسیا گیا اے کہ ٹیم دی حتمی فہرست توں پہلاں تمام کھلاڑیاں دی فٹنس رپورٹ حاصل کیتی جاوے گی، تے کئی پلئیرز نوں زیر غور نہ لیان دا امکان وی موجود اے۔
ذرائع مطابق یشسوی جیسوال، سئی سدھرسن تے کے ایل راہول ایشیا کپ مس کر سکدے نیں،ابھیشیک شرما تے سنجو سیمسن دی ٹیم وچ شمولیت تقریباً یقینی اے،شبمن گل بارے حتمی فیصلہ باقی، پر اوہنوں ٹی 20 سکواڈ وچ شامل کیتا جا سکدا اے،جسپریت بمرا دی شرکت وی صرف فٹنس تے منحصر اے
سلیکٹرز دی کوشش اے کہ مضبوط ترین بھارتی سکواڈ تشکیل دتا جاوے، پر ٹاپ آرڈر وچ تسلسل نال پرفارم کرن والے کھلاڑیاں دی موجودگی نے فیصلہ مشکل بنا دتا اے۔
واضح رہے کہ ایشیا کپ 9 ستمبر توں متحدہ عرب امارات وچ شروع ہو رہا اے، جتھے بھارت، پاکستان، عمان تے یو اے ای گروپ اے وچ شامل نیں۔
