خیبرپختونخوا وچ حالیہ بارش تے اچانک سیلاب دی وجہ نال وڈے پیمانے اُتے جانی تے مالی نقصان ہویا اے، جیہڑا صوبائی ڈیزاسٹر مینجمنٹ اتھارٹی (پی ڈی ایم اے) نے اپنی رپورٹ وچ جاری کیتا اے۔رپورٹ دے مطابق مختلف حادثیاں وچ اج تک 358 بندے زندگی دی بازی ہار گئے، جدوں کہ 181 زخمی ہوئے نیں۔ جان بحق ہون والیاں وچ 287 مرد، 41 عورتاں تے 30 بچے شامل نیں، جدوں کہ زخمی لوکاں وچ 144 مرد، 27 عورتاں تے 10 بچے شامل نیں۔برکھا تے سیلاب نال کُل 780 مکاناں متاثر ہوئے، جنہاں وچ 431 نوں جزوی تے 349 نوں مکمل نقصان پہنچیا اے۔پی ڈی ایم اے مطابق ضلع بونیر سب توں زیادہ متاثر ہویا اے، جتھے اج تک 225 بندے جان بحق ہو چکے نیں۔ ہور متاثرہ ضلعے سوات، باجوڑ، مانسہرہ، شانگلہ، دیر لوئر، بٹگرام تے صوابی نیں۔محکمہ موسمیات دے مطابق ہور شدید برکھا دا امکان اے تے موجودہ بارشاں دا سلسلہ 21 اگست تک وقفے وقفے نال جاری رہ سکدا اے۔پی ڈی ایم اے نے متاثرہ ضلعیاں دی انتظامیہ نوں حکم دتا اے کہ امدادی سرگرمیاں تیز کیتیاں جان تے متاثرہ لوکاں نوں فوری ریلیف دتا جائے۔ ترجمان مطابق ایمرجنسی آپریشن سینٹر مکمل طور تے فعال اے تے عوام کسی وی ناخوشگوار واقعے یا موسمی صورتحال بارے جانکاری لئی ہیلپ لائن 1700 اُتے رابطہ کر سکدے نیں۔
