اسرائیلی فوج دا غزہ دے النصر ہسپتال اُتے حملہ

غزہ: اسرائیلی فوج نے اج النصر ہسپتال نوں باقاعدہ نشانہ بنایا، جس نال ڈیوٹی اُتے موجود 4 صحافیاں سمیت 15 افراد شہید ہو گئے۔رپورٹ  دے مطابق شہید ہون والے صحافیاں وچ غیر ملکی خبر ایجنسی رائٹرز دا کیمرہ مین حسام المصری، امریکی خبر ایجنسی ایسوسی ایٹڈ پریس تے برطانوی اخبار "دی انڈیپینڈنٹ” دی نامہ نگار مریم ابودقہ، امریکی ٹی وی این بی سی نیٹ ورک دا صحافی ابوطحہ تے الجزیرہ دا فوٹو جرنلسٹ محمد سلامہ شامل نیں۔عرب میڈیا مطابق اسرائیلی فوج تے وزیراعظم دفتر نے النصر ہسپتال اُتے حملے بارے فوری ردعمل توں گریز کیتا اے۔رپورٹ مطابق 4 ہور صحافیاں دی شہادت توں بعد غزہ وچ اکتوبر 2023 توں اسرائیلی حملے وچ جان گنوان والے صحافیاں دی تعداد ہُن 244 ہو گئی اے۔ قطری نشریاتی ادارے مطابق غزہ اُتے اسرائیلی بمباری وچ 24 کنٹیاں دوران 51 فلسطینی شہید ہو گئے۔شمالی غزہ وچ اسرائیلی ٹینکاں نے گولا باری تے جنوبی تے وسطی حصے وچ باقاعدہ بمباری کیتی، جس نال ہزار توں زائد عمارتاں مکمل تباہ ہو گئیاں۔ ایہ بمباری غزہ اُتے مکمل قبضے دی طرف قدم سمجھی جا رہی اے۔اسرائیلی حملے وچ جاں بحق ہون والیاں وچ امداد دے انتظار وچ 24 افراد وی شامل نیں۔ اس توں علاوہ بھُکھ دی شدت نال ہور 8 فلسطینی انتقال کر گئے، جس نال غذائی قلت کارن اموات دی تعداد 115 بچیاں سمیت 289 تک پہنچ گئی۔واضح رہے کہ اسرائیلی حملے دے نتیجے وچ غزہ وچ شہیداں دی کُل تعداد 62 ہزار 600 توں ودھ ہو گئی اے، جدوں کہ اک لکھ 57 ہزار توں ودھ افراد زخمی نیں۔