لیک فون کال دا معاملہ: تھائی لینڈ دی وزیراعظم عہدے توں ہٹا دتی گئی

بنکاک: عدالت نے تھائی لینڈ دی وزیراعظم نوں لیک ٹیلی فون کال دے معاملے اُتے عہدے توں ہٹا دتا۔عالمی میڈیا دی رپورٹ  دے مطابق تھائی لینڈ دی وزیراعظم پائیتونگٹارن شنواترا، جو ارب پتی خاندان نال تعلق رکھدیاں سن، ملکی تاریخ دی چھٹی تے سبھ توں کم عمر وزیراعظم سن۔ پر اوہنوں آئینی عدالت نے فون لیک معاملے اُتے برطرف کر دتا۔عدالت دا کہنا اے کہ جون وچ لیک ہون والی فون کال دوران پائیتونگٹارن شنواترا نے اخلاقیات دی خلاف ورزی کیتی تے اوہ کمبوڈیا دے طاقتور وزیراعظم ہون سین توں مرعوب نظر آئیاں، جدوں دونوں ملک مسلح جھڑپاں وچ الجھے ہوئے سن۔میڈیا رپورٹ  دے مطابق آئینی عدالت دے فیصلے بعد حکمران جماعت "پھیو تھائی پارٹی” دی پوزیشن کمزور ہو گئی اے تے ملک وچ نویاں چوناں دا رستہ کھل گیا اے۔عدالتی فیصلے دے نال ہی، فون لیک ہون توں بعد حکومتی اتحاد توں علٰحدہ ہون والی سابق اتحادی جماعت "بھوم اجے تھائی پارٹی” وی نواں حکومت بناؤن لئی سامنے آ گئی اے۔ اوہناں دے قائد آنوتن چارنویراکول ہور جماعتاں دی حمایت حاصل کرن دی کوشش وچ نیں تے وعدہ کر رے نیں کہ 4 مہینے وچ پارلیمنٹ تحلیل کرن گے۔ادھر برطرف وزیراعظم پائیتونگٹارن نے تمام جماعتاں نوں اپیل کیتی اے کہ تھائی لینڈ وچ سیاسی استحکام لاؤن لئی اکٹھے کم کرن۔ اوہناں آکھیا کہ "میں شہریاں دی زندگی دا تحفظ چاہندی ساں، چاہے اوہ فوجی ہون یا عام لوک۔ تے میں اس لئی پرعزم ساں کہ جنگ شروع ہون توں پہلاں انہاں دی حفاظت لئی ہر ممکن اقدام کراں۔”یاد رہے کہ پائیتونگٹارن آئینی عدالت ولوں گزشتہ 17 سال وچ برطرف کیتے گئے وزرائے اعظم وچ تھائی لینڈ دی پنجویں وزیراعظم نیں۔ ایہہ اقدام شنواترا خاندان دیاں حکومتاں تے طاقتور کنزرویٹو تے شاہی خاندان دے وفادار جرنیلاں دے گٹھ وچ جاری کشمکش دا مظہر اے۔