امریکی وزیر خارجہ مارکو روبیو

امریکی وزیر خارجہ مارکو روبیو نے آکھیا اے کہ امریکا پاکستان تے بھارت دے درمیان جنگ بندی اُتے مسلسل نظر رکھے ہوئے اے۔ جنگ بندی قائم رکھنی آسان کم نئیں، ایہہ ہمیشہ پیچیدہ تے چیلنجنگ ہوندی اے۔اک انٹرویو وچ امریکی وزیر خارجہ نے آکھیا کہ اسی پاکستان تے بھارت اُتے نظر رکھے ہوئے آں۔ ساڈی مسلسل کوشش اے کہ پاک بھارت وچ کیہہ ہورہا اے، جنگ بندی اوہدوں ایہہ ممکن اے جدوں دونویں  پاسے لڑائی روکن  اُتے رضا مند ہون، تے روس نے اجے تک ایس کم وچ کردار نئیں نبایا۔مارکو روبیو نے آکھیا کہ امریکا روزانہ مختلف علاقے، جیویں  پاکستان تے بھارت، کمبوڈیا تے تھائی لینڈ دے حالات اُتے نظر رکھدا اے، تاں کہ جنگ بندی قائم رکھی جا سکے۔ جنگ بندی دا معاہدہ کدے وی ٹُٹ سکدا اے، خاص طور اُتے یوکرین وچ تین سال دی جنگ توں بعد۔ پر ساڈا مقصد صرف اک عارضی جنگ بندی نئیں، ساڈا مقصد مستقل امن معاہدہ اے تاں کہ نہ اج جنگ ہووے تے نہ مستقبل وچ۔روبیو نے دسیا کہ اسی خوش قسمت آں کہ ساڈے کول ایسا صدر موجود اے جس نے امن نوں اپنی انتظامیہ دی ترجیح بنایا اے۔ اسی کمبوڈیا تے تھائی لینڈ وچ امن دیکھیا اے، بھارت تے پاکستان وچ وی امن دی کوشش کیتی گئی اے، تے اسی دنیا بھر وچ امن لئی ہر موقع دا فائدہ چکاں گے۔امریکی صدر ڈونلڈ ٹرمپ نے 10 مئی نوں سوشل میڈیا اُتے اعلان کیتا کہ انڈیا تے پاکستان نے واشنگٹن دی ثالثی وچ طویل رات دی گل بات توں بعد مکمل تے فوری جنگ بندی اُتے اتفاق کیتا۔اِس توں بعد ٹرمپ نے لگ بھگ 40 وار دعویٰ کیتا اے کہ اوہناں نے انڈیا تے پاکستان دے درمیان کشیدگی نوں حل کرن وچ مدد کیتی اے، تے ایہہ وی آکھیا کہ جے اوہناں جوہری ہتھیاراں نال لیس ہمسایے تنازع بند کر دیندے نیں، تاں امریکا اوہناں نال وڈا کاروبار کرے گا۔دوجے پاسے بھارتی وزیراعظم نریندر مودی تے وزیر خارجہ ایس جے شنکر نے صاف آکھیا اے کہ ایس جنگ بندی وچ کسے تیسرے فریق دی مداخلت نئیں ہوئی تے نہ ایہہ معاہدہ تجارت نال جُڑیا اے، جیویں ٹرمپ نے دعویٰ کیتا۔