کراچی وچ طوفانی بارش

 شہر قائد وچ پچھلے دنہاں توں موسلا دھار بارش دا سلسلہ جاری اے، جندی وجہ توں  شہر دے کئی علاقے سخت متاثر ہوئے نیں۔ سڑکاں تے پانی کھڑا ہون نال ٹریفک نظام درہم برہم ہو گیا، گلشن اقبال، گلستان جوہر، ملیر تے ہور علاقے مکمل طور تے بجلی توں محروم نیں۔منگل دی صبح توں وقفے وقفے نال برکھا ہورہی اے، جس نال نشیبی علاقے وچ پانی بھر گیا تے کئی گھراں وچ وی پانی داخل ہو چکیا اے۔قائدآباد، لانڈھی، ملیر تے ہور علاقیاں وچ گھراں وچ پانی داخل ہون دیاں خبراں نیں، جدوں کہ شہر دیاں اہم سڑکاں، جیویں شاہراہِ فیصل، آئی آئی چندریگر روڈ تے ایم آر کیانی روڈ تالاب دا منظر پیش کر ریااے،تیز برکھا دی وجہ توں سندھ سیکرٹریٹ وچ پارکنگ دا شیڈ گر گیا۔ اطلاع ملدے ہی ریسکیو 1122 دی ٹیم ایمبولینس تے ریسکیو گڈیاں نال موقعے تے پہنچ گئی۔ترجمان ریسکیو 1122 سندھ مطابق نشیبی علاقیاں وچ پھنسے لوکاں نوں کڈھن دیاں  کوششاں جاری نیں۔ماہرین موسمیات دے مطابق کراچی اُتے ہور بدل بن ریااے تے ہور برکھا دی توقع اے۔ محکمہ موسمیات اگلے دو دن برکھا لئی "اہم” قرار دتا اے۔ماہرین دے مطابق کراچی وچ  شدید بارش  نال اربن فلڈنگ دا خدشہ اے۔ شہریاں نوں ہدایت دتی گئی اے کہ گرج چمک دے دوران غیر ضروری طور تے گھراں توں باہر نہ نکلن تے ایمرجنسی توں علاوہ فون استعمال توں پرہیز کرن۔سڑکاں اُتے موجود لوکاں نوں درختاں، کھمبیاں تے لوہے دیاں باڑاں توں دور رہن لئی کہیا گیا اے کیوں کہ آسمانی بجلی انہاں نوں نشانہ بنا سکدی اے۔شہر دے ترقیاتی منصوبے وی شہریاں لئی مشکل بنے ہوئے نیں۔ لیاقت آباد وچ سیوریج دے کم بعد گڑھے بند نہ کیتے گئے، جدے وچ برکھا دا پانی بھر گیا تے کئی گڈیاں پھس گئیاں۔نارتھ ناظم آباد دی لنڈی کوتل چورنگی اُتے سڑک دا حصہ دھنس جان نال ٹریفک متاثر ہوئی،چیف سیکرٹری سندھ آصف حیدر شاہ نے حکم دتا کہ سب ڈپٹی کمشنر فیلڈ وچ موجود رہن تے برساتی پانی دی نکاسی یقینی بنان۔کے-الیکٹرک، حیسکو تے سیکپو نوں بلا تعطل بجلی سپلائی برقرار رکھن لئی فعال رہن لئی کہیا گیا اے۔کے-الیکٹرک ترجمان کہندا اے کہ بجلی دے کھمبیاں، تاراں تے تنصیبات توں دور رہو۔ حفاظتی پروٹوکول دے مطابق نشیبی تے تجاوزات والیاں جگہاں اُتے بجلی عارضی طور تے بند کیتی گئی اے۔