چیئرمین جوائنٹ چیفس جنرل ساحر شمشاد نال جنوبی افریقہ دے ایئرچیف دی ملاقات
چیئرمین جوائنٹ چیفس جنرل ساحر شمشاد نال جنوبی افریقہ دے ایئرچیف دی ملاقات
چیئرمین جوائنٹ چیفس آف سٹاف کمیٹی جنرل ساحر شمشاد مرزا نال جنوبی افریقہ دی فضائیہ دے سربراہ دی ملاقات ہوئی اے۔
پاک فوج دے شعبہ تعلقات عامہ (آئی ایس پی آر) دے مطابق جنوبی افریقہ دی فضائیہ دا سربراہ جوائنٹ سٹاف ہیڈکوارٹرز پہنچیا، جتھے معزز مہمان نوں تینوں افواج دے چاق و چوبند دستے نے گارڈ آف آنر پیش کیتا۔
آئی ایس پی آر مطابق جنوبی افریقہ دے ایئرچیف لیفٹیننٹ جنرل وائز مین سیمو مبامبو نے چیئرمین جوائنٹ چیفس آف سٹاف کمیٹی جنرل ساحر شمشاد نال ملاقات کیتی، جس وچ باہمی دلچسپی دے امور، دفاعی تعاون تے فوجی رابطیاں دے فروغ تے گل بات ہوئی۔
دونوں معزز شخصیات نے افواج دے درمیان تعاون نوں ہور وسعت دین لئی عملی اقدامات اُتے گفتگو کیتی، نالے عالمی تے علاقائی جغرافیائی سیاسی منظرنامے اُتے وی خیالات دا تبادلہ ہویا۔
پاک فوج دے ترجمان مطابق چیئرمین جوائنٹ چیفس آف سٹاف کمیٹی نے جنوبی افریقی مہمان نوں خطے دی سکیورٹی صورتحال بارے پاکستانی موقف توں آگاہ کیتا تے خطے وچ امن و استحکام لئی پاکستان دیاں کوششاں نوں نمایاں کیتا۔
لیفٹیننٹ جنرل وائز مین سیمو مبامبو نے پاکستان دیاں مسلح افواج دیاں پیشہ ورانہ صلاحیتاں نوں سراہیا تے دہشت گردی دے خلاف جنگ وچ انہاں دیاں قربانیاں دا خراجِ تحسین پیش کیتا۔
