مریم نواز دی تھائی لینڈ دی کاروباری برادری نوں سرمایہ کاری دی دعوت

لاہور:وزیراعلیٰ پنجاب مریم نواز شریف نے تھائی لینڈ دی کاروباری برادری نوں سرمایہ کاری دی دعوت دتی اے۔وزیراعلیٰ پنجاب مریم نواز شریف دے اعزاز وچ تھائی لینڈ دے سابق وزیراعظم تے ٹیلی کمیونیکیشن دے شعبے دی ممتاز کاروباری شخصیت تھکسان شینا وترا ولوں عشائیہ تقریب دا اہتمام کیتا گیا، جس وچ تھائی لینڈ دی تاریخ دی سب توں کم عمر سابق خاتون وزیراعظم پائیتونگترن شینا وترا وی شامل ہوئیاں۔تھکسان شینا وترا تے اوہدی دھی نے وزیراعلیٰ پنجاب دا پر تپاک خیر مقدم کیتا تے پاکستان مسلم لیگ (ن) دے صدر تے سابق وزیراعظم محمد نواز شریف لئی نیک تمنائیاں تے خیر سگالی دے جذبات دا اظہار کیتا۔دونوں سابق وزرائے اعظم نے مریم نواز شریف دے ترقیاتی وژن، انتظامی اقدامات تے عوامی فلاح دے منصوبیاں نوں سرا ہا۔ تھکسان شینا وترا نے گفتگو دے دوران آکھیا کہ تُہاڈے تے تُہاڈے والد دی عوامی جدوجہد متاثر کن اے۔وزیراعلیٰ پنجاب نے وی تھائی قیادت دیاں عوامی خدمات، اصلاحات تے معیشت دی ترقی لئی اقدامات نوں سرا ہندے ہوئیاں آکھیا کہ تھائی لینڈ وچ تُہاڈی متعارف کرائی اصلاحات نے ادارہ جاتی صلاحیت وچ اضافے دی نویں مثال قائم کیتی اے۔ پاکستان تے تھائی لینڈ دی دوستی باہمی احترام، معاشی تعاون تے ثقافتی ہم آہنگی اُتے مبنی اے۔مریم نواز نے آکھیا کہ اسی ٹیکسٹائل، زراعت، سیاحت تے ٹیکنالوجی دے شعبیاں وچ تجارت تے سرمایہ کاری نوں فروغ دینا چوندے آں۔ تھائی کاروباری برادری پنجاب حکومت ولوں فراہم کیتیاں مراعات توں فائدہ اٹھا سکدی اے کیوں جو اتھوں علاقائی منڈیاں تک رسائی آسان اے۔وزیراعلیٰ نے ثقافتی سفارتکاری، تعلیم تے سیاحت دے فروغ نوں لوکاں نوں قریب لیان دا مؤثر ذریعہ قرار دتا تے دسیا کہ پنجاب حکومت ڈیجیٹل نیشن دے وژن تحت نوجواناں نوں جدید شعبیاں وچ ہنرمند بنا رہی اے۔