بھارت دا پاکستان نال دوجا رابطہ

اسلام آباد: بھارت نے مئی دی جنگی صورتحال توں بعد پاکستان نال دوجا باقاعدہ رابطہ کیتا اے تے دریائے ستلج وچ ہور پانی چھڈن دی اطلاع دتی اے۔بھارتی ہائی کمیشن ولوں پاکستانی حکام نوں دریائے ستلج وچ ہور پانی دی آمد بارے آگاہ کیتا گیا، اطلاع دے مطابق بھارت ہری کے پتن توں دریائے ستلج وچ ہور پانی چھڈ سکدا اے۔ایہہ وی واضح اے کہ ستلج وچ سیلاب دی وجہ توں پہلے ای پاکستان دے کئی شہر تے پِنڈ متاثر ہورہے نیں، ہزاراں لوک بے گھر ہو چکے نیں، ہزاراں ایکڑ تے کھڑیاں فصلاں تباہ ہورہیاں نیں، بھارت دے پانی چھڈن نال ستلج دے حفاظتی بند ٹُٹ گئے، بستیاں ہیٹھ آگئیاں، لوک بے گھر ہوگئے۔ایس توں پہلاں مئی دی جنگ توں بعد بھارت نے کل پاکستان نال پہلی وار سرکاری سطح تے رابطہ کیتا سی تے جموں دے مقام تے دریائے توی وچ سیلاب دی اطلاع دتی سی۔سندھ طاس معاہدے دی روشنی وچ بھارت نے جموں دے مقام تے ممکنہ وڈے سیلاب دی باضابطہ اطلاع پاکستان نوں دتی اے، جس توں بعد حکومت پاکستان نے الرٹ وی جاری کر دتا۔یاد رہے ایس توں پہلاں بھارت نے اعلان کیتا سی کہ اوہ سندھ طاس معاہدے اُتے عمل درآمد معطل کر دتا اے۔ مئی وچ پاک-بھارت جنگ توں بعد ایہ اپنی نوعیت دا پہلا وڈا رابطہ سی تے اج دوجا رابطہ ہویا اے جتھے توی توں بعد ستلج وچ پانی چھڈن بارے دسیا گیا اے۔