بھارت ولوں پانی چھڈن توں بعد پنجاب دے دریا بپھر گئے، کئی پِنڈ متاثر

لاہور: بھارت ولوں دریاواں وچ پانی چھڈن تے بارشاں توں بعد پنجاب دے وڈے دریاواں وچ پانی دے بہاؤ وچ اضافہ ہوریا اے،، دریائے چناب، ستلج تے راوی وچ پانی دی سطح چڑھ کے خطرناک حد تک ودھ گئی،پنجاب دے کئی علاقیاں وچ سیلابی ریلے نے تباہی مچا دِتی، جس نال کئی پِنڈاں وچ پانی داخل ہو گیا۔ پنجاب وچ انتہائی اونچے درجے دے سیلاب کرکے ضلعی انتظامیہ دی مدد لئی پاک فوج نُوں وی بُلا لیا گیا اے۔بھارت نے دریائے راوی وچ 2 لکھ کیوسک دا ریلا چھڈ دِتا، لگاتار برکھاواں بعد دریائے راوی، چناب تے ستلج بپھر گئے۔ دریائے راوی وچ انتہائی اونچے درجے دا سیلاب اے۔ شاہدرہ دے نشیبی علاقیاں وچ سیلاب دے خدشے نال الرٹ جاری کر دِتا گیا۔دریائے راوی  دے مقام تے وی انتہائی اونچے درجے دا سیلاب اے تے پانی دا بہاؤ 2 لکھ 29 ہزار 700کیوسک ریکارڈ ہویا۔ سیلابی ریلے نال شاہدرہ تے موٹر وے-ٹو دے نشیبی علاقیاں وچ سیلاب دا خطرہ اے۔

نارووال وچ دریائے راوی دا پانی کرتارپور کوریڈور وچ داخل ہو گیا، سکھاں دی عبادت گاہ نُوں نقصان پہنچن دا خدشہ اے۔ گردوارے وچ 5 توں 7 فٹ پانی موجود اے۔ نارووال روڈ وی سیلاب وچ آ گیا۔، شکر گڑھ شاہراہ وی ٹریفک لئی بند کر دِتی گئی۔دریائے راوی وچ شکر گڑھ بھیکو چک دے مقام تے بند وچ شگاف پے گیا، جس نال کئی پِنڈاں وچ پانی آ گیا۔ متاثرہ پِنڈاں توں لوکاں دی نقل مکانی جاری اے۔ شکر گڑھ دے گاؤں جرمیاں جھنڈے دے علاقے وچ پھسے 21 لوکاں نُوں ریسکیو کر لیا گیا۔دریائے راوی وچ پانی دا بہاؤ لگاتار ودھ رہا اے۔ حالات نُوں ویکھدے ہوئے سول ڈیفنس نے الرٹ جاری کیتا تے سائرن وی وڄائے گئے۔ہور پاسے دریائے ستلج وی بپھر گیا، ہیڈ گنڈا سنگھ تے پانی دا بہاؤ 2 لکھ 45 ہزار کیوسک ریکارڈ ہویا۔دریائے ستلج وچ بہاولنگر دے مقام تے پانی دی سطح ہور چڑھ گئی، کئی پِنڈاں دا زمینی رابطہ ٹُٹ گیا۔ ہیڈ سلیمانکی تے اونچے درجے دے سیلاب دا خدشہ اے۔ متاثرہ علاقیاں وچ رینجرز، فوج تے پولیس دا ریسکیو آپریشن جاری اے۔ ہزاراں بندیاں تے مویشیاں نُوں محفوظ تھاواں تے پہنچا دِتا گیا۔عارف والا دے مقام تے دریائے ستلج وچ شدید طغیانی نال کنڈ شمس، کنڈ قابل، بلاڑی قصوریہ دے علاقے پانی وچ ڈُب گئے۔ کئی چھوٹیاں وڈیاں بستیاں سیلابی پانی نال گھِر گئیاں۔پاکپتن وچ دریائے ستلج وچ بابا فرید پل دے مقام تے اک لکھ کیوسک دا ریلا گزر ریا اے، جندی وجہ توں  ہنگامی الرٹ جاری ہویا۔ دریائی بیلٹ خالی کران لئی مسجداں وچ اعلان کروائے جا رہے نیں۔پاکپتن وچ 100 توں ودھ چھوٹیاں وڈیاں بستیاں سیلاب نال متاثر نیں۔ 4 ہزار توں ودھ متاثرہ لوکاں نُوں محفوظ تھاواں تے منتقل کیتا گیا۔ کئی پِنڈاں دا زمینی رابطہ وی ٹُٹ گیا۔دریائے ستلج وچ سیلاب نال سرحدی علاقے دے 30 پِنڈاں وچ پانی گھُس گیا۔ہور پاسے دریائے چناب وچ وی انتہائی اونچے درجے دا سیلاب اے، کئی پِنڈاں دا رابطہ ٹُٹ گیا۔وزیرآباد وچ ہیڈ خانکی تے پانی دی سطح چڑھ گئی، بہاؤ 7 لکھ 5 ہزار کیوسک پہنچ گیا۔ چناب نگر دے مقام تے پانی دی سطح لگاتار ودھدی پئی اے، پانی دا بہاؤ 1 لکھ 13 ہزار کیوسک ریکارڈ ہویا۔ضلعی انتظامیہ دے مطابق ہیڈ مرالہ توں 7 لکھ کیوسک دا سیلابی ریلا چناب نگر وچ داخل ہونا شروع ہو گیا۔ نشیبی آبادی دے مکیناں نُوں محفوظ تھاواں تے منتقل ہون دی ہدایت جاری ہو گئی۔دریائے چناب وچ کوٹ مومن دے مقام تے شدید سیلابی حالات نیں۔ 7 لکھ کیوسک توں ودھ دا ریلا گزرے گا۔ ڈپٹی کمشنر محمد وسیم دے مطابق 3 ریلیف کیمپس فعال کر دِتے گئے نیں، ہور کیمپس دا انتظام مکمل کیتا جا رہا اے۔ عملہ الرٹ اے، پاک فوج نُوں وی طلب کر لیا گیا اے۔علی پور چٹھہ رسول نگر دے نیڑے دریائے چناب دا ٹُٹیا بند لوکاں نے اپنی مدد نال بند کر دِتا۔نالہ ڈیک وچ وی انتہائی اونچے درجے دا سیلاب اے۔ 77 ہزار کیوسک دا ریلا ہنجلی پل نُوں وی بہا لے گیا۔ درجناں پِنڈ پانی وچ ڈُب گئے۔ نالہ ڈیک دا سیلابی پانی پسرور شہر وچ داخل ہو گیا۔ پانی نارووال، سیالکوٹ تے چونڈہ روڈ دے اُتے آ گیا۔ سکروڑ، دیولی، جنڈیالہ، منگوال تے ہور پِنڈاں وچ پانی گھُس کے فصلہں نُوں ڈبو دِتا۔پاکستان رینجرز (پنجاب) دا سیلاب متاثرہ علاقیاں وچ ریسکیو تے ریلیف آپریشن جاری اے۔ ضلع قصور دے گنڈا سنگھ والا علاقے وچ رینجرز دے جواناں نے 6890 بندے تے 1024 مویشیاں نُوں محفوظ تھاماں تے منتقل کیتا۔