نائب وزیراعظم تے فیلڈ مارشل دی ترک صدر نال ملاقات
نائب وزیراعظم تے فیلڈ مارشل دی ترک صدر نال ملاقات، دو طرفہ تعلقات اُتے زور دِتا
نائب وزیراعظم تے وزیر خارجہ اسحاق ڈار تے فیلڈ مارشل سید عاصم منیر دی ترک صدر رجب طیب اردوان نال ملاقات ہوئی۔
ترجمان دفتر خارجہ دے مطابق، ایہ ملاقات او آئی سی اجلاس دیاں سائیڈ لائنز تے ہوئی۔ وزیر خارجہ اسحاق ڈار نے وزیر اعظم شہباز شریف دیاں نیک تمناؤاں دا پیغام ترک صدر تک پہنچایا۔
اسحاق ڈار نے پاکستان تے ترکیہ دے وچکار پائیدار دوطرفہ تعلقات دی اہمیت اُتے زور دِتا۔ دونے رہنماواں نے طویل المدتی برادرانہ تعاون نوں مزید مضبوط تے متنوع بناؤن دے عزم دا اعادہ کیتا۔
ملاقات وچ ایران اسرائیل کشیدگی نوں گھٹاؤن لئی سفارتی کوششاں جاری رکھن اُتے اتفاق کیتا گیا۔
رہنماواں نے عالمی برادری کولوں مطالبہ کیتا کہ اوہ خطے وچ امن تے استحکام دی بحالی لئی موثر کردار ادا کرے۔
دونے رہنماواں نے غزہ وچ جاری اسرائیلی جارحیت نوں فوری روکنے تے محصور فلسطینی عوام تک انسانی امداد دی بلا رکاوٹ فراہمی یقینی بناؤن دی فوری ضرورت اُتے زور دِتا۔
وزیر خارجہ اسحاق ڈار نے صدر اردوان نوں او آئی سی وزرائے خارجہ اجلاس دی کامیاب میزبانی تے اسلامی تعاون تنظیم یوتھ فورم ولوں انہاں دی قیادت نوں سراہن اُتے دِتے گئے ایوارڈ تے مبارکباد پیش کیتی
