مذہبی رواداری تے باہمی احترام دا فروغ ساڈا عزم اے: مریم نواز

 وزیراعلیٰ پنجاب مریم نواز شریف نے آکھیا اے کہ ہر سطح تے مذہبی رواداری تے باہمی احترام دا فروغ ساڈا عزم اے۔عقیدے تے مذہب دی بنیاد اُتے تشدد تے نفرت دا نشانہ بنن والے افراد دے عالمی دن اُتے اپنے پیغام وچ وزیراعلیٰ پنجاب مریم نواز دا کہنا سی کہ ساڈی ہمدردی اوہناں مظلوماں نال اے جیہڑے مذہبی تعصب دی وجہ نال ظلم سہندے پئے نیں۔ اسلاموفوبیا دنیا بھر وچ اک کڑوی حقیقت اے۔اوہناں آکھیا کہ مسجداں اُتے حملے، حجاب پان  والیاں عورتاں  اُتے پابندیاں، تے مسلماناں  نوں دہشت گردی نال جوڑن دی سوچ انسانیت لئی داغ اے۔ فلسطین دی دھرتی شہیداں دے لہو نال سرخ اے، معصوم بچیاں دیاں آہاں گولیاں دی گھن گرج وچ دب رہیاں نیں۔اوہناں دسیا کہ کشمیر دیاں وادیاں اجے تک صدیاں  پرانے دکھاں نال لہو لہان نیں۔ کشمیر تے غزہ انسانیت دے ضمیر اُتے سوال نیں جنہاں دا جواب عالمی برادری اجے تک نہیں دے سکدی۔ اسی ہمیشہ اوہناں مظلوماں دے نال کھڑے آں جیہڑے مذہبی بنیاداں اُتے ظلم تے زیادتی دا نشانہ بن رہے نیں۔مریم نواز نے ہور آکھیا کہ دین اسلام محبت، امن تے رواداری دا پیغام دیندا اے۔ اسی ہر مظلوم دے نال ہاں تے ہمیشہ رہاں گے۔ ہر سطح اُتے مذہبی رواداری تے باہمی احترام دا فروغ ساڈا عزم اے۔