آسٹریلیا نے ایران اُتے یہود مخالف حملے کران دا الزام لایا

سڈنی:  آسٹریلیا نے اعلان کیتا اے کہ اوہ کینبرا وچ ایران دے سفیر نوں ملک بدر کرے گا تے پاسدارانِ انقلاب اُتے پابندی لگائے گا۔وزیراعظم انتھونی البانیز نے تہران اُتے الزام لایا کہ اوہنے سڈنی تے میلبورن دے اہم شہراں وچ دو یہود مخالف حملے کرائے۔اکتوبر 2023 وچ اسرائیل-غزہ جنگ شروع ہون توں بعد آسٹریلیا وچ گھراں، سکولاں، یہودی عبادت گاہاں تے گاڑیاں نوں یہود مخالف حملے، توڑ پھوڑ تے آگ لگاؤن والے واقعات دا نشانہ بنایا گیا۔وزیراعظم البانیز نے دسیا کہ آسٹریلیا دیاں سکیورٹی ایجنسیاں نوں مصدقہ انٹیلی جنس ملی اے کہ ایرانی حکومت نے کٹّو کٹ 2 حملے کراؤن دی ہدایت دتی۔ ایران نے 20 اکتوبر 2023 نوں سڈنی دے "لوئس کانٹی نینٹل کچن” تے 6 دسمبر نوں میلبورن دی "اداس اسرائیل سیناگاگ” اُتے حملے کرائے۔ ایران مزید حملے کراؤن دی منصوبہ بندی وی کر رہا سی۔البانیز نے آکھیا کہ ایہہ اک غیر معمولی تے خطرناک جارحیت سی جو اک غیر ملکی ریاست نے آسٹریلوی سرزمین اُتے منظم کیتی۔ ایہہ ساڈے معاشرے وچ پھوٹ پاؤن تے سماجی یکجہتی نوں نقصان پہنچاؤن دی کوشش سی۔اوہنے دسیا کہ آسٹریلیا نے تہران وچ اپنے سفارتخانے دیاں سرگرمیاں معطل کر دتیاں نیں، تے تمام سفارتکار محفوظ طریقے نال اک تیسرے ملک وچ موجود نیں۔البانیز نے اعلان کیتا کہ اوہدی حکومت ایران دی پاسدارانِ انقلاب اسلامی نوں "دہشت گرد تنظیم” قرار دے گی۔