برطانیہ ولوں پاکستان دے سیلاب متاثرین لئی امداد دا اعلان

 برطانیہ نے پاکستان وچ حالیہ مون سون بارشاں تے سیلاب نال متاثرہ علاقیاں لئی 1.33 ملین پاؤنڈ  دی انسانی ہمدردی اُتے مبنی امداد دا اعلان کیتا اے۔ایس امداد نال پنجاب، گلگت بلتستان تے خیبر پختونخوا دے 7 متاثرہ اضلاع وچ 2 لاکھ 23 ہزار توں ودھ افراد نوں سہولتاں فراہم کیتیاں جان گیاں۔برطانوی ہائی کمشنر جین میریٹ نے آکھیا کہ برطانوی تعاون نال متاثرہ کمیونٹیز نوں فوری مدد پہنچائی جا رہی اے، جیہڑے وچ خشک راشن دی فراہمی، سرچ اینڈ ریسکیو آپریشنز، موبائل میڈیکل کیمپس، پینے دے پانی دے نظام دی بحالی، نہری نظام دی مرمت تے کھیتی باڑی لئی معاونت شامل اے۔ہُن تک 2,400 مقامی رضاکاراں نوں سرچ اینڈ ریسکیو دی تربیت دِتی جا چکی اے، جنہاں وچوں 25 رضاکار چارسدہ توں ریسکیو 1122 دی مدد لئی بونیر پہنچ چکے نیں۔ کئی علاقیاں وچ موبائل میڈیکل کیمپس قائم کیتے جا رہے نیں تاکہ اوہناں تھاماں اُتے بنیادی صحت دیاں سہولتاں مہیا کیتیاں جا سکّن جتھے کلینکس نوں نقصان پہنچیا اے۔ایس توں علاوہ متاثرہ خانداناں نوں خیمے، راشن، گھریلو سامان تے خواتین لئی ڈگنٹی کِٹس وی دِتیاں جا رہیاں نیں۔ اقوام متحدہ دے انسانی ہمدردی دے ادارے (UNOCHA) دے کوآرڈینیٹرز امدادی تنظیمان دے نال مل کے کم کر رہے نیں تاکہ امداد تیزی تے مؤثر طریقے نال تقسیم ہو سکّے۔