وزیراعظم شہباز شریف تے فیلڈ مارشل عاصم منیردادورہ

وزیراعظم شہباز شریف تے فیلڈ مارشل عاصم منیر سیلاب نال متاثرہ علاقیاں دے دورے لئی پہنچ گئے۔وزیراعظم شہباز شریف تے فیلڈ مارشل سید عاصم منیر سب توں پہلا سوات پہنچے جتھے وفاقی وزیر امیر مقام نے اوناں دا استقبال کیتا، وفاقی وزیراں عطاء اللہ تارڑ، امیر مقام تے احسن اقبال وی وزیراعظم نال سن۔سوات توں بعد وزیراعظم تے فیلڈ مارشل بونیر روانہ ہوئے جتھے انہاں نے بونیر، شانگلہ تے صوابی دے متاثرہ علاقیاں دا فضائی جائزہ لیا۔دورے  دے دوران وزیراعظم شہباز شریف تے فیلڈ مارشل سید عاصم منیر نوں ریسکیو تے امدادی کارروائیاں اُتے تفصیلی بریفنگ دِتی گئی، بعد وچ وزیراعظم نے بونیر وچ متاثرین نال ملاقات کیتی تے امدادی چیک تقسیم کیتے۔ایس موقعے اُتے وزیراعظم نے سیلاب متاثرین نال اظہارِ یکجہتی کیتا تے مشکل دی ایس گھڑی وچ بھرپور مدد تے تعاون دی یقین دہانی کرائی۔وزیراعظم شہباز شریف نے اکھیا  کہ متاثرہ علاقیاں وچ بحالی دے عمل نوں تیز کرن لئی تے معمولاتِ زندگی نوں دوبارہ بحال کرن لئی سارے دستیاب قومی وسائل بروئے کار لیائے  جان گے۔ تجاوزات، لکڑی مافیا تے خاص طور اُتے آبی گذرگاہاں وچ ہوندی غیرقانونی کان کنی تے کرشنگ انسانی جانا‏ں دے ضیاع تے نقصاناں دا وڈا سبب بنندے نیں۔شہباز شریف نے آکھیا کہ غیر قانونی سرگرمیاں، تجاوزات تے ماحولیاتی تباہی دا باعث بنن والے عناصراں دے  خلاف قانون دے مطابق سخت اقدام لازمی نیں۔ایس موقعے اُتے فیلڈ مارشل سید عاصم منیر نے وی متاثرہ علاقیاں وچ ریسکیو آپریشن وچ مصروف پاک فوج، پولیس تے سول انتظامیہ دے اہلکاراں نال ملاقات کیتی تے امدادی سرگرمیاں وچ مصروف جواناں دے بے لوث جذبے نوں سراہا۔