سیلاب

خیبر پختونخوا، گلگت بلتستان تے آزاد کشمیر وچ طوفانی بارشاں تے سیلابی صورتحال دی وجہ توں حادثیاں وچ ہُن تک 330 توں ودھ بندے جان بحق ہو چکے نیں۔صرف بونیر وچ ایہہ قدرتی آفت 213 جاناں نگل گئی، جدو کہ کئی ہور بندے لاپتہ ہو گئے نیں۔ مانسہرہ وچ وی سیلابی ریلے تے پہاڑی تودے ڈگن نال  20 بندے جان بحق ہو گئے۔ ایس دے علاوہ باجوڑ وچ بدل پھٹن دے بعد آن والے سیلاب تے لینڈ سلائیڈنگ دی وجہ توں 21 بندے مارے گئے۔بدل پھٹن دے بعد آن والا سیلاب  کئی پنڈاں نوں بہا لے گیا، لوکاں دے گھر ٹٹ گئے، سیلابی پانی وچ جانور تے گڈیاں وی روڑھ گئیاں، بونیر وچ ایمرجنسی نافذ کر دِتی گئی۔ سوات وچ بپھریا ہویا دریا جدے سامنے جو وی آیا اوہنوں تنکیاں وانگر بہا لے گیا۔ مینگورہ کولوں گُزرن والی ندی دا پانی گھراں وچ داخل ہو گیا، پانی دے زور نال رابطے والے پل وی متاثر ہو گئے۔ آزاد کشمیر دی وادی نیلم وچ سیلابی ریلے دریا اُتے بنے 6 رابطہ پل نوں بہا لے گئے۔ وکھ وکھ حادثیاں وچ 11 بندے جان توں گئے، مظفر آباد وچ بادل پھٹنے نال اک ای خاندان دے 6 بندیاں سمیت 8 بندے مارے گئے۔دوجے پاسے گلگت بلتستان وچ سیلابی ریلیاں نے کئی علاقیاں وچ تباہی مچائی۔ اسکردو وچ وی 5 پل دریا وچ بہہ گئے، تے چلاس دے اوچھار نالے وچ کئی بندے پانی وچ بہہ گئے، جتھوں ہُن تک 10 بندے جاں بحق ہو چکے نیں۔