سٹاک مارکیٹ وچ نویں تاریخ رقم

پاکستان سٹاک مارکیٹ وچ تاریخی ریکارڈ قائم ہو گیا، ہنڈرڈ انڈیکس پہلی واری ایک لاکھ 50 ہزار پوائنٹس دی حد وی عبور کر گیا۔کاروباری ہفتے دے دوسرے دن کاروبار دے آغاز اُتے زبردست تیزی دیکھن نوں ملی، جس نال سٹاک مارکیٹ دا ہنڈرڈ انڈیکس پہلی واری ڈیڑھ لاکھ پوائنٹس توں اگے نکل گیا۔ٹریڈنگ دوران پاکستان سٹاک ایکسچینج وچ 2000 توں ودھ پوائنٹس دے اضافے نال ہنڈرڈ انڈیکس 150,323 پوائنٹس دی بلند ترین سطح اُتے پہنچ گیا، حالانکہ دن دے اختتام اُتے ایہہ کچھ کمی نال 149,770 پوائنٹس اُتے بند ہویا۔خریداری وچ خاص دلچسپی آٹوموبائل اسمبلرز، کمرشل بینکنگ، سیمنٹ تے فارماسیوٹیکل سیکٹرز وچ دیکھی گئی۔ وڈیاں  کمپنیاں جیویں ڈی جی خان سیمنٹ، ایچ بی ایل، ایم سی بی، میزان بینک تے یو بی ایل دے شیئرز مثبت زون وچ ٹریڈ ہوئے۔ماہرین دے مطابق ایہہ تیزی حکومت دیاں متوقع گردشی قرضے نال متعلق اصلاحات دیاں خبراں دی وجہ توں  آئی اے۔ سرمایہ کاراں نوں امید اے کہ توانائی شعبے وچ لیکویڈیٹی دے مسئلے وچ کمی آوے گی، جیہڑا لمبے عرصے توں ملکی معیشت لئی وڈا چیلنج بنا ہویا اے۔یاد رہے کہ پچھلے کاروباری دن دے اختتام اُتے پاکستان سٹاک مارکیٹ دا ہنڈرڈ انڈیکس 1704 پوائنٹس دے اضافے نال 148,196 پوائنٹس دی بلند ترین سطح اُتے بند ہویا سی۔