لاہور دیاں راوی کنارے بستیاں پانی ہیٹھ، بھارت توں اج اک ہور سیلابی ریلہ آئے گا

لاہور: پنجاب دے دارالحکومت لاہور دیاں آبادیاں وی سیلاب دی لپیٹ وچ آ گئیاں، لوکاں نوں محفوظ تھاواں تے منتقل کیتا جا ریا اے، بھارتی اج شام اک ہور سیلابی ریلہ  چناب وچ آئے گا جدوں کہ اج پنجاب سمیت سارے ملک وچ مون سون بارش  دا نواں سلسلہ شروع ہون دی پیش گوئی کیتی گئی اے، جس نال سیلابی صورتحال ہور وی خراب ہوسکدی اے۔راوی، چناب تے ستلج وچ طغیانی نال لاہور، قصور، جھنگ، حافظ آباد، پاکپتن، سیالکوٹ، چنیوٹ، منڈی بہاؤالدین، گوجرانوالہ، وزیرآباد، سرگودھا، نارووال، بہاولنگر تے بہاولپور سمیت کئی ضلعے سخت متاثر ہوئے نیں۔صوبہ پنجاب وچ پچھلے  چالی سالاں وچ آن والے بدترین سیلاب دی وجہ نال حکام دے مطابق ایس ہفتے دوران 14 لکھ 60 ہزاردے قریب لوکاں نوں اپنے گھر  چھڈ کے محفوظ تھاواں تے پناہ لینا پیا اے۔ حالیہ سیلاب نے پنجاب دے سینکڑاں پینڈاں وچ تباہی مچا دتی، اناج دیاں اہم فصلاں وی پانی ہیٹھاں آگئیاں نیں۔پنجاب دی ڈیزاسٹر مینجمنٹ اتھارٹی آکھیا اے کہ مون سون دیاں طوفانی بارشاں  تے پڑوسی ملک ولوں ڈیم وچوں ودھ پانی چھڈن نال صوبے وچ بہن والے تین دریاؑواں وچ پانی دا بہاؤ بہت ودھ گیا، کئی تھاواں تے دریا دے کنارے وی توڑنے پئے، جس دی وجہ توں  1692 توں ودھ پینڈاں وچ سیلابی پانی داخل ہو گیا۔

لاہور

ڈپٹی کمشنر لاہور موسیٰ رضا آکھدے نیں کہ دریائے راوی وچ ایس ویلے دو لکھ 11 ہزار کیوسک دا ریلا گزر ریا اے، اگلے 10 کنٹیاں وچ پانی دے بہاؤ وچ ہور کمی آ جائے گی۔لاہور وچ اجے تک کوئی ہلاکت رپورٹ نہیں ہوئی، دو ہزار دے لگ بھگ شہرینوں پہلے کڈھیا گیا سی، جیہڑے لوک نہیں جا سکے اوہناں نوں 18 ریلیف کیمپا وچ ٹھہرایا گیا اے، پنج کیمپا وچ اجے لوک موجود نیں، اوہناں نوں ناشتہ تے کھانا دتا جا ریا اے۔نارووال وچ وی پانی کٹ ہو ریا اے، ساڈا فوکس ایس ویلے ریسکیو آپریشن تے اے، ساڈی مختلف ضلعیاں توں آن والی سبزیاں دی سپلائی لائن تھوڑی متاثر ہوئی اے۔

راوی وچ شاہدرہ دے مقام تے اوچے درجے دے سیلاب نال لاہور دے کئی علاقے متاثر، لوکاں نوں نقل مکانی کرنا پئی

رنگ روڈ نال لگدی بادامی باغ دی علاقے وچ وی دریائے راوی دا سیلابی پانی داخل ہو گیا، چوہنگ دے مختلف علاقے وی پانی ہیٹھاں آ گئے نیں، چوہنگ دی پرائیویٹ ہاؤسنگ سوسائٹی وچ پانی داخل ہون توں بعد مکیناں نے رات گئے نقل مکانی کر لئی۔منظور گارڈن، برکت کالونی تے مانوال سمیت ہور کئی علاقے سیلابی پانی نال بھر گئے، فرخ آباد، عزیز کالونی، امین پارک، افغان کالونی، شفیق آباد وی پانی ہیٹھاں چلے گئے۔ شہری انتظامیہ دی طرفوں مکیناں دی نقل مکانی یقینی بناؤن دا دعویٰ کیتا گیا اے۔

راوی دے ہائی رسک علاقے

ہائی رسک علاقیاں وچ لاہور دے شاہدرہ، کوٹ محبو، جیا موسیٰ، عزیز کالونی، قیصر ٹاؤن، فیصل پارک، دھیر، کوٹ بیگم شامل نیں۔ضلع شیخوپورہ وچ فیض پور، دھمیکے، ڈاکہ، برج عطاری، کوٹ عبدالمالک وچ سیلاب دا خطرہ اے۔

قصور تے خانیوال دے کئی علاقے ہائی رسک قرار، بھارتوں چناب وچ نواں ریلا

ضلع قصور دے علاقے پھول نگر، رکھ خان کے، نتی خالص، لمبے جگیر، کوٹ سردار، ہنجرائے کلاں، بھتروال کلاں تے نوشہرہ گئیاں نوں ہائی رسک قرار دتا گیا اے۔

ضلع خانیوال وچ غوث پور، میاں چنوں، امید گڑھ، کوٹ اسلام، عبدالحکیم تے کبیروالہ وچ سیلاب دی پیش گوئی کیتی گئی اے۔

بھارتوں چناب وچ نواں ریلا

فلڈ فورکاسٹنگ پنجاب نے بھارت دی طرفوں پانی چھڈن بارے نواں مراسلہ جاری کیتا اے۔ مراسلے وچ آکھیا گیا اے کہ بھارتوں سیلابی ریلا اج شام دریائے چناب دے ہیڈ تریموں بیراج پہنچے گا۔ہیڈ تریموں بیراج تے انتہائی اوچے درجے دا سیلابی ریلا آئے گا، جدو‏ں کہ 2 ستمبر نوں ہیڈ پنجند دے مقام تے وی انتہائی اوچے درجے دا ریلا پہنچے گا۔

سیلاب نال جاں بحق افراد دے لواحقین لئی مالی امداد

ڈی جی پی ڈی ایم اے عرفان کاٹھیا دے مطابق حکومت پنجاب والوں ہر فرد دے لواحقین نوں 10 لکھ روپے دتے جان گے۔ اوہ آکھدے نیں کہ ہُن تک 3 لکھ توں ودھ مویشیاں نوں محفوظ تھاماں تے منتقل کیتا گیا اے۔فیصل آباد دے تاندلیانوالہ دے مقام تے دریائے راوی وچ پانی دی سطح ودھن کارن نشیبی علاقیاں دے مکین محفوظ تھاماں تے منتقل کیتے جا رئے نیں۔ سیلاب دے خدشے نوں مدنظر رکھدے ضلع انتظامیہ تے متعلقہ ادارے الرٹ نیں۔دریائے راوی نے نارنگ منڈی وچ وی تباہی مچا دتی، ہزاراں ایکڑ زرعی زمین تباہ ہو گئی۔ مواصلات دا نظام درہم برہم ہون نال کئی پینڈ تے ڈیرے زمینی رستے توں کٹ گئے۔

ایس دے نال نال نارووال دے کئی پینڈ پانی ہیٹھاں آگئے، ہزاراں ایکڑ تے کھڑیاں فصلاں تباہ ہو گئیاں۔ شکرگڑھ–نارووال روڈ وی پانی وچ ڈب گیا، جدوں کہ قلعہ احمد آباد وچ ریلوے ٹریک سیلاب دی زد وچ آ گیا، جس کارن ٹریناں دی آمدورفت بند کر دتی گئی۔

ملتان دے ہیڈ محمدوالا تے بریچ دا فیصلہ

دوجے پاسے ملتان وچ دریائے چناب دا خطرناک ریلہ اگلے 24 توں 48 گھنٹیاں وچ شہر دیاں حدن وچ داخل ہو سکدا اے۔ شہری آبادی نوں بچاؤن لئی ہیڈ محمدوالا تے بریچ کرن دا فیصلہ کیتا گیا اے۔کمالیہ وچ دریائے راوی دی سطح خطرناک حد تک ودھ گئی اے تے انتہائی اوچے درجے دا ریلا علاقے ولّ ودھ ریا اے۔ سیلابی پانی نے قریبی رہائشی بستیواں وچ داخل ہون شروع کر دتا اے۔ 26 پینڈاں وچ ہنگامی صورتحال نافذ کر کے انخلا دے احکامات جاری کر دتے گئے نیں۔

چنیوٹ دی تحصیل لالیاں وچ موضع کلری دا حفاظتی بند ٹٹن نال سو توں ودھ پینڈ پانی دی لپیٹ وچ آ گئے، ہزاراں لوکاں نے نقل مکانی شروع کر دتی۔ چنیوٹ وچ 8 لکھ 5300 کیوسک توں ودھ پانی دا سیلابی ریلا گزر ریا اے۔

ساہیوال وچ اورنگ آباد دا بند شگاف کھان لگا، آلیدے علاقے پانی ہیٹھاں

ساہیوال وچ اورنگ آباد دے بند وچ شگاف پینا شروع ہو گیا اے، بند نال لگدیاں آبادیواں پانی دی لپیٹ وچ آ گئیاں نیں۔ انتظامیہ نے مکیناں نوں محفوظ تھاماں تے منتقل ہون دی ہدایت جاری کر دتی اے۔

راول ڈیم دے سپل وے کھل دتے گئے

این ڈی ایم اے دے ترجمان دے مطابق پانی دی سطح 1,751 فٹ تک پہنچن تے صبح 6 وجے راول ڈیم دے سپل وے گیٹ کھول دتے گئے۔ کورنگ نالے وچ پانی دے بہاؤ نوں قابو کرن لئی حفاظتی اقدامات جاری نیں۔

چناب تے ستلج وچ اوچے درجے دا سیلاب

فلڈ وارننگ سینٹر نے خبردار کیتا اے کہ دریائے چناب دا بہاؤ کوٹ مومن تے 10 لکھ کیوسک تک پہنچ سکدا اے۔ مڈھ رانجھا سمیت 50 توں ودھ پینڈ پانی ہیٹھاں آ گئے نیں۔