پاک-امریکا تعلقات

 امریکی ریاست کیلیفورنیا دی سینیٹ نے پاک-امریکا تعلقات تے ریاست کیلیفورنیا دی معیشت، سماج تے ثقافت دی ترویج وچ پاکستانی نژاد کمیونٹی دیاں خدمات دے اعتراف وچ تاریخی قرارداد متفقہ طور اُتے منظور کر لئی۔ایہہ قرارداد سینیٹر میلیسا ہرٹاڈو ولوں پیش کیتی گئی۔ قرارداد پیش کرن وقت سینیٹر میلیسا ہرٹاڈو نے پاکستانی لباس پایا تے مہندی لا کے کیلیفورنیا سینیٹ دے ایوان وچ آئیاں۔سینیٹر ہرٹاڈو کیلیفورنیا سینیٹ دی سب توں کم عمر خاتون منتخب رُکن نیں تے سینیٹ کمیٹی برائے زراعت دیاں چیئرمین وی نیں۔ انہاں دی پیش کردہ قرارداد پاکستان تے امریکا دے درمیان دیرینہ تے کثیر جہتی تعلقات نوں اجاگر کردی اے تے دنیا دی چوتھی وڈی معیشت کیلیفورنیا دی ترقی وچ پاکستانی نژاد امریکی لوکاں دے اہم کردار دا وی اعتراف کردی اے۔سینیٹر میلیسا ہرٹاڈو نے تاریخی قرارداد پیش کردے ہوئیاں اپنے ریمارکس وچ پاک-امریکا تعلقات نوں اجاگر کیتا تے آکھیا کہ امریکا وچ پاکستانی کمیونٹی دی کہانی قربانی، عزت تے حوصلے توں عبارت اے۔ایس موقع اُتے سفیرِ پاکستان رضوان سعید شیخ دی سینیٹ وچ موجودگی نوں سراہندے ہوئیاں سینیٹر ہرٹاڈو نے پاک-امریکا تعلقات دی فروغ لئی انہاں دا شکریہ ادا کیتا۔ریاستی سینیٹ وچ بھرپور پذیرائی تے خاص طور اُتے تاریخی قرارداد منظور کراؤن لئی سفیرِ پاکستان رضوان سعید شیخ نے سینیٹر میلیسا تے کونسل آف پاکستان دیاں کوششان نوں سراہیا۔سفیرِ پاکستان نے ایس موقع اُتے پاک-امریکا تعلقات تے عوامی رشتیاں نوں ہور مضبوط بناؤن دے عزم دا اظہار کیتا۔سفیرِ پاکستان نے آکھیا کہ کیلیفورنیا سینیٹ ولوں پاکستان دے 79ویں یومِ آزادی دے موقع اُتے قرارداد دی متفقہ منظوری ساڈے مضبوط تعلقات دی عکاس اے جو صرف حکومتاں دی سطح اُتے نئیں بلکہ دونویں ملکاں دیاں عوام دے درمیان وی موجود نیں۔