مون سون دے نویں سپیل دا آغاز

ملک وچ مون سون سیزن دا اک ہور طاقتور سپیل شروع ہو گیا، خیبر پختونخوا دے کئی ضلعے لگاتار سخت برسات دے نال متاثر نیں۔ صوابی وچ بدل پھٹن نال تباہی مچ گئی، مختلف حادثیاں وچ 15 بندے جان بحق تے کئی زخمی ہو گئے نیں، جانی نقصان ودھن  دا خدشہ اے۔پولیس حکام نے دسیا کہ صوابی دے علاقے داروڑی وچ بدل پھٹن دا واقعہ پیش آیا، جس دے نتیجے وچ درجناں گھر ڈُب گئے۔ شہری جان بچان لئی چھتاں اُتے چڑھ گئے، 70 توں ودھ محصور افراد نوں سیلاب وچوں ریسکیو کیتا گیا۔صوابی دیاں تحصیلاں رزڑ، لاہور تے ٹوپی وچ طوفانی بارش توں بعد گھراں وچ پانی داخل ہو گیا۔ لوک چھتاں اُتے پناہ لے بیٹھے۔ سٹیفہ موڑ گدون وچ کئی لوک سیلابی ریلے وچ پھنس گئے۔ متاثرہ افراد امداد دے انتظار وچ نیں۔ہسپتال ذرائع دے مطابق گدون امازئی دے گاؤں سرکوئی پایاں وچ مکان دی چھت گر گئی، ملبے تھلے دب کے 4 بندے جان بحق تے 7 زخمی ہو گئے۔ جان بحق ہون والیاں وچ دو عورتاں تے دو بچے شامل نیں۔جہانگیرہ روڈ، امبارو کنڈہ موڑ تے ہر پاسے پانی کھڑا ہو گیا، تور ڈھیر وچ نجی سکول دی دیوار ڈھ گئی، ڈپٹی کمشنر صوابی نصراللہ خان نے تصدیق کیتی کہ دالوڑی گاؤں وچ کلاؤڈ برسٹ نال کئی گھر تباہ ہو گئے نیں، تیز ریلے دے باعث لینڈ سلائیڈنگ وی ہو رہی اے۔ ریسکیو ٹیمز موقعے اُتے روانہ نیں۔نوشہرہ وچ پبی تحصیل دے اک مکان دی چھت بارش نال گر گئی، میاں بیوی جان بحق ہو گئے۔ پشاور وچ موسلادھار بارش توں بعد کئی علاقے ڈُب گئے۔سوات دے مینگورہ تے بالائی علاقے وچ ندی نالے طغیانی نال بھر گئے نیں۔ ہری پور تے ایبٹ آباد وچ شاہراہاں بند ہو گئیاں نیں۔راولا کوٹ تے مضافات وچ شدید بارش نال نالے بپھر گئے، لینڈ سلائیڈنگ نال راولپنڈی روڈ بند ہو گیا۔ہری پور وچ شاہ مقصود دے نالے وچ خالی وین بہہ گئی، خوش قسمتی نال جانی نقصان نہیں  ہویا۔خانپور ڈیم وچ پانی حد توں ودھ گیا، سپل ویز کھول دتے گئے۔کرک وچ لگاتار بارش نال پہاڑی علاقے باقی شہراں توں کٹ گئے نیں۔پنجاب دے کئی ضلعے وچ موسلادھار بارش نال جل تھل اک ہو گیا۔ ملتان، چکوال، وہاڑی تے ڈیرہ غازی خان وچ نشیبی علاقے ڈُب گئے۔مری وچ سخت بارش تے دھند نال نظام زندگی متاثر ہو گیا، کئی علاقے بجلی توں محروم نیں۔کراچی وچ ہلکی تے تیز بارش نال موسم خوشگوار ہو گیا۔این ڈی ایم اے نے پنجاب، خیبرپختونخوا ہزارہ ڈویژن، آزاد کشمیر تے گلگت بلتستان وچ بددل پھٹن دے خدشے دا اظہار کیتا اے۔ شہریاں تے سیاحاں نوں دریا تے نالیاں دے قریب نہ جان دی ہدایت کیتی گئی اے۔محکمہ موسمیات دے مطابق مون سون دا موجودہ سپیل 23 اگست تک جاری رہ سکدا اے، تے کراچی وچ وی وڈی بارش متوقع اے۔