پاک-امریکہ عسکری تعلقات وچ کلیدی کردار اُتے امریکی جنرل نوں نشانِ امتیاز نال نوازیا گیا
پاک-امریکہ عسکری تعلقات وچ کلیدی کردار اُتے امریکی جنرل نوں نشانِ امتیاز نال نوازیا گیا
حکومتِ پاکستان نے امریکی سینٹرل کمانڈ دے کمانڈر جنرل مائیکل ای کوریلا نوں پاک-امریکہ دیرپا فوجی تعاون دے فروغ وچ اوہناں دی نمایاں خدمات دے اعتراف وچ ملک دا اعلیٰ عسکری اعزاز نشانِ امتیاز (ملٹری) عطا کیتا اے۔
پاک فوج دے شعبہ تعلقاتِ عامہ (آئی ایس پی آر) دے مطابق ایوانِ صدر اسلام آباد وچ اک پروقار تقریب دوران صدرِ پاکستان آصف علی زرداری نے جنرل مائیکل ای کوریلا نوں نشانِ امتیاز (ملٹری) دا اعزاز عطا کیتا۔
بیان وچ آکھیا گیا اے کہ خطے وچ سلامتی تے استحکام لئی اوہناں دیاں خدمات تے پاکستان-امریکہ دے وچکار اسٹریٹجک دفاعی تعلقات نوں مضبوط بنان والی کوششاں دی تعریف کیتی گئی اے۔ جنرل کوریلا دی وژنری قیادت نال باہمی اعتماد، دفاعی تعاون تے انسداد دہشت گردی دے شعبے وچ پاک فوج تے امریکی سینٹکام دے درمیان شراکت داری ہور وی مضبوط ہوئی اے۔
آئی ایس پی آر نے دسیا اے کہ اوہناں دی مسلسل شمولیت پاکستان دے علاقائی امن تے استحکام وچ اک مرکزی کردار دی عکاس اے۔ ایہ اعلیٰ قومی اعزاز نہ صرف جنرل کوریلا دی خدمات دا اعتراف اے بلکہ ایہ پاکستان تے امریکہ دے وچکار ودھدے ہوئے فوجی تعلقات دی جھلک وی پیش کردا اے۔
بیان وچ ایہ وی آکھیا گیا اے کہ اپنے دورہ پاکستان دوران جنرل کوریلا نے صدرِ مملکت، چیف آف آرمی سٹاف جنرل عاصم منیر سمیت اعلیٰ سول تے عسکری قیادت نال ملاقاتاں کیتیاں، جنہاں وچ علاقائی سکیورٹی، فوجی تعاون تے دہشت گردی سمیت ابھردے ہوئے بین الاقوامی خطرات اُتے تفصیلی گل بات کیتی گئی۔
اس توں پہلاں، ایوانِ صدر پہنچن اُتے جنرل کوریلا نوں پاکستان دیاں تینوں افواج دے چاق و چوبند دستے نے گارڈ آف آنر پیش کیتا۔
آئی ایس پی آر دے بیان مطابق، ایہ اعزاز پاک-امریکہ اسٹریٹجک شراکت داری دی مضبوط بنیاداں تے دوناں ملکاں دے علاقائی امن و سلامتی دے مشترکہ عزم دی تصدیق کردا اے۔
