فیلڈ مارشل تے ٹرمپ دی ملاقات نال پاک امریکہ تعلقات ہور وی مضبوط ہون گے، بلاول بھٹو

چیئرمین پاکستان پیپلز پارٹی بلاول بھٹو زرداری نے آکھیا اے کہ فیلڈ مارشل سید عاصم منیر تے امریکی صدر ڈونلڈ ٹرمپ دی ملاقات نال پاک امریکہ تعلقات ہور وی مضبوط ہون گے۔
بلاول بھٹو زرداری نے "ایکس” اُتے اپنے بیان وچ آکھیا کہ اج فیلڈ مارشل سید عاصم منیر تے امریکی صدر ڈونلڈ ٹرمپ دے درمیان ملاقات ہووے گی، ایہہ ملاقات پاک امریکہ تعلقات وچ بہتری ول اک مثبت قدم اے۔
اوہناں آکھیا کہ ایہ ملاقات اوس ویلے ہو رہی اے جدوں ٹرمپ نے جنگ بندی وچ ثالثی دا کردار ادا کیتا اے، پنج دن دی جنگ وچ پاکستان نے بھارت خلاف فیصلہ کن کامیابی حاصل کیتی اے۔
ساوِق وزیر خارجہ نےمزید آکھیا کہ بھارت نے بدقسمتی نال امن دی کوششاں تے امریکی سفارتکاری نوں رد کر دتا۔ پاکستان نہ تے تصادم دا خواہاں اے تے نہ ہی مذاکرات دی بھیک منگدا اے۔ اسی ایہہ گل تسلیم کردے آں کہ امن دوناں ملکاں دے مفاد وچ اے۔
بلاول بھٹو زرداری دا کہنا سی کہ ساڈے تنازعات دا کوئی فوجی حل نئیں۔ بھارت دی آبی وسائل نوں ہتھیار بناون والی پالیسی تے کشمیر وچ ظلم تے جبر ناقابلِ قبول نیں۔
اوہناں مزید آکھیا کہ بھارت دا دہشت گردی نوں سیاسی رنگ دینا وی اک ناقابلِ برداشت روش اے۔ اگے دا راہ صرف ایماندار سفارتکاری نال ممکن اے، نہ کہ انکار تے تاخیر نال۔